【法國寶藏】差些少 洛里斯唔打世盃打溫網

2018年07月14日 08:43
東網電視
更多新聞短片
洛里斯今屆賽事表現神勇。(Getty Images/互聯網)

即上彩報世盃專頁:http://win.on.cc/football/cup2018/ 

法國大戰克羅地亞嘅世盃決賽,周日會撞正網壇盛事溫布頓男單決賽舉行,其實如果命運只要有多少改變,今晚會以法國隊長身份領軍出戰世盃決賽嘅門神洛里斯,將可能會去咗打溫網決賽。

現年31歲嘅法國門神洛里斯,雖然依家貴為法國國家隊國腳,但其實喺佢13歲之前,一直係足球、網球兩邊走,當時打得一手好網球嘅佢,係國內最頂尖少年球員,前途無限,不過去到選擇時刻,洛里斯終於決定投身足球,否則,呢位熱刺門將會唔會周日出現溫網決賽賽場比賽,真係冇人知?

當然,最終洛里斯揀咗足球,證明佢絕冇揀錯。由佢開始加入尼斯青年軍開始,到之後轉投法甲班霸里昂,然後過檔熱刺,呢位以反應快及決斷準見稱嘅門神,就用一次又一次精彩贏出贏得各界認同。

至今已經103次代表法國出賽嘅佢,喺今屆賽事成功撲救率有73.3%,上陣6場雖然失咗4球,但其實佢有4場係保持到清白之軀。洛里斯每場波都出現精彩撲救,當中最重要包括喺8強對烏拉圭救出馬田卡沙利斯嘅必入波,仲有係4強對比利時面對艾達韋列特嘅閃電轉身勁射嘅神救,都令佢成為今屆世盃金手套嘅熱門人選。

有望繼主帥迪甘斯之後,成為第2位帶領法國贏得世盃冠軍隊長嘅洛里斯,對「高盧雄雞」究竟有幾重要?聽聽迪甘斯喺4強賽後點樣講呢位熱刺門神嘅神救:「呢個並非撲救,佢嘅價值根本同入波冇分別!」又睇吓洛里斯喺決賽仲有幾多「入波」先啦!

東網體育同你追實體壇每個精彩時刻! 
https://goo.gl/ewVpvE