盧卡古敗家到癲　親手送金靴獎畀卡尼

東網電視

（互聯網）

世界盃季軍戰比利時對英格蘭，最大看點係盧卡古同哈利卡尼嘅神射手戰。今仗賽前卡尼已射入6球，盧卡古就有4球斬獲，為搶金靴獎佢兩個當然希望爭取入球，但卡尼近自16強以後就冇晒影，今仗起腳機會亦寥寥可數；相反盧卡古就有兩個絕佳機會入波，盧卡古今次搶神射手失敗，除咗怨自己之外，都冇咩可以賴。

哈利卡尼於分組賽已入5球，其中對弱旅巴拿馬攻入3球，其中1球係來自隊友遠射省中佢隻腳彈入，堅係行運行到腳趾尾，另外6個入球當中3個係12碼。去到8強、4強到季軍戰，英格蘭對手較強之下，卡尼被對手嘜死，最後就再冇波入。

盧卡古於季軍戰有2個入波機會，其中一球出現喺下半場，當時奇雲迪布尼直線妙傳畀該名曼聯射手，但佢竟然攞晒腳，被對手門將比克福特出迎接走皮球，比利時球迷應該睇得好躁。唔少網民賽後即時狂畀魔嚴負皮：「波都控唔定走去爭神射手」、「果然淨係識屈弱旅」、「英格蘭冇失波畀盧卡古，都證明隊波唔算太渣」。

除盧卡古已4球完成賽事外，能參與決賽嘅法國雙雄基利安麥巴比同基沙文，目前只各有3個入球，一場實難以追到卡尼，故呢名英格蘭隊長，極大機會取得神射手獎。

東網體育FB同你追實體壇每個精彩時刻！

on.cc東網