港超聯　理文大變身迎接新球季

20180717
  • 東網電視
    更多新聞短片
    理文於將軍澳寶翠公園展開新球季首課操練。(陳焌鏗攝)
    港超聯球會理文周二（17日）假將軍澳寶翠公園展開季前操練，一眾球隊教練團及職球員，除了袁皓俊、余煒廉、余沛康及鄭兆均等4位球員需要隨港隊U23前往泰國進行備戰亞運的集訓外，其餘球隊成員均有出席。
    在收操後，主教練陳曉明透露重投香港球壇只因渴望新挑戰：「我自己喺澳門都有兩年時間，做得開心嘅，亦都散播咗唔同種子，但澳門受制於環境，好多嘢需要更多時間先有成果。我又覺得係時候接受另一啲挑戰，咁啱理文同我傾咗好幾次。完成咗澳門隊喺亞洲盃個使命之後，個時機都幾適合，加上老闆嘅使命、願景都同自己嘅睇法都好吻合，亦畀咗好大自由度我哋，我覺得呢個係一個好好嘅平台去延續夢想。」
    而「曉明Sir」口中的願景、使命，就是希望推動香港足球走向更專業：「好多時大家都將香港唔夠進步歸咎於硬件、學校制度等等，呢啲嘢喺我哋呢個層面做唔到，但係有啲嘢係我哋可以做到，譬如：知識、能力、態度。另外，我哋有全職嘅醫學團隊去支援我哋，佢哋好貼心咁去照顧每個球員，好多人睇職業足球都淨係睇球員、教練，但係我覺得球員嘅復康係我哋點樣練更加重要。」
    另外，袁皓俊、余煒廉、余沛康及鄭兆均等4位需出戰亞運，或會影響球隊季前備戰，但「曉明Sir」則表示全力支持：「我同會長李生（李文恩）嘅願景都想為香港足球做一啲嘢，都係想為香港隊栽培啲球員，所以我哋球會一定會配合。我哋會全力支持入咗香港隊嘅球員，唔係得把口講，我哋會有額外嘅獎勵畀呢班球員，詳情會稍後公佈。」
    至於球隊新球季目標，「曉明Sir」期望看見球員進步：「我哋希望打到入三甲，但大家唔好唔記得，以往我或者『達Sir』嘅戰績都係可以帶領球隊贏班費更高嘅球隊。我哋最緊要係令到球員有進步，我同李生合作係一個3年嘅長期計畫，佢亦唔介意今年攞唔到冠軍，但係我哋嘅目標係每一場都要贏。」
    【理文2018-2019球季球員名單】
    球衣號碼 姓名 位置
    44 高俊* 門將
    83 彭梓鍵* 門將
    88 袁皓俊* 門將
    5 干沙利斯* 後衞
    6 余煒廉* 後衞
    9 雲貝基* 後衞
    14 方栢倫* 後衞
    18 黃炎堃* 後衞
    27 陳衍光* 後衞
    29 余沛康 後衞
    8 談樂軒* 中場
    15 黃駿軒 中場
    16 顏樂楓 中場
    17 周家樂 中場
    20 白智勳* 中場
    21 羅俊仁 中場
    30 域陀 中場
    37 陳銘剛 中場
    7 史提芬彭利拿 前鋒
    10 戴倫度* 前鋒
    11 鄭兆均* 前鋒
    12 黎耀昌 前鋒
    13 許嘉樂 前鋒
    92 梁嘉恆* 前鋒
    註:*為新加盟球員