【有片】阿根廷門將被割喉死 疑兇都係球員

20180724
東網電視
更多新聞短片
阿根廷爆血腥殺人事件!據西班牙《馬卡報》報道,曾經踢過阿甲班霸河床青年軍嘅25歲門將艾斯賓度拿,上星期日凌晨喺酒吧外捲入打鬥,隨時畀人用刀割喉殺死!阿根廷警方已拘捕2名疑犯,其中一個竟然都係足球員!
艾斯賓度拿喺2013年至16年效力丙組球會艾馬高(Almagro),上周日佢喺布宜諾斯艾利斯酒吧蒲到朝早6點半,離開嗰陣喺街上同人爭執,繼而大打出手,期間有人拎出一把刀刺向艾斯賓度拿頸部,報道指艾斯賓度拿幾乎即場死亡。
警方事後拘捕2名疑犯,其中一位叫奧維度嘅人亦係足球員,目前效力阿根廷丙組球會聖特爾莫(San Telmo),佢同另一巴拉圭籍朋友當時坐喺一部滿布血跡嘅車內,警方並喺命案現場15條街外發現凶器,但係暫時未知凶手行兇動機。
東網體育FB同你追實體壇每個精彩時刻!