八千萬鎊巨星玩嘢 唔願返美國跟曼聯操
20180728
東網電視
更多新聞短片
（互聯網）
安東尼馬迪爾同莫連奴唔啱嘴型，新一季呢名法國前鋒，堅未必仲係紅魔鬼球員。曼聯目前於美國開展季前操練，並參加國冠盃，但依家領隊莫連奴淨係得番阿歷斯山齊士一個正選前鋒。盧卡古因為踢世界盃仲放緊假，咁馬迪爾又點呢？原來佢女伴剛啱生咗個囝囝，馬迪爾已離開美國陪家人。英國《每日郵報》透露，馬迪爾完全唔想返美國歸隊，因為已預咗離開曼聯。
馬迪爾自畀伊巴謙莫域搶咗件9號波衫後，於球隊就一直鬱鬱寡歡，而且場上表現亦時好時壞，絕非莫連奴心目中嘅可靠射手。馬迪爾依家先得22歲，潛質非常優厚，莫連奴就算肯賣馬迪爾，都要得到8000萬鎊轉會費。現時除有傳熱刺對馬迪爾有興趣外，似乎冇咩球員肯出天價買人，但馬迪爾於曼聯又唔開心，表現又唔算突出，對寸王嚟講，呢名前鋒非常雞肋。現時球隊應付國冠盃前線人手緊拙，但寸王話：「我冇辦法阻止馬迪爾去見佢嘅家人。」睇嚟佢同馬迪爾嘅關係，只會愈來愈僵。
東網體育FB同你追實體壇每個精彩時刻！