奧斯爾改着10號兼做隊長　入波怒炒PSG

周六(28日)晚上國冠盃大戰喺新加坡上演，其中世盃失利之後嘅奧斯爾，成功抛開早前宣佈離開德國隊嘅陰影，成功帶領阿仙奴以5比1擊敗巴黎聖日耳門，除咗入波證明自己實力之餘，仲幫領隊艾美利，一吐畀舊主聖日耳門炒魷嘅烏氣。

奧斯爾因為同土耳其總統嘅合照風波，憤而退出德國國家隊，搞到滿城風雨。呢位進攻中場雖然喺德國畀人閙到爆，不過喺兵工廠就依然好受歡迎，領隊艾美利早前就力撐呢位中場，仲畀埋10號波衫佢着，話要畀呢位前德國國腳家嘅感覺。

而呢場正選上陣，兼戴埋隊長臂章嘅奧斯爾，即刻用實際行動回報兵工廠新帥嘅信任，13分鐘就接應奧巴美揚嘅妙傳，射破巴黎聖日耳門門將保方嘅十指關，為阿仙奴搶得領先優勢。

阿仙奴之後被罰12碼，聖日耳門由尼干古射入追番1球，但兵工廠再憑拿卡錫迪梅開二度，洛賀丁、尼基迪亞入波，以5比1大勝巴黎聖日耳門。