渣過簡慕華 國米簡達華連環派膠益車仔
20180729
東網電視
更多新聞短片
（互聯網）
國冠盃車路士鬥國際米蘭，車路士一開波係威係勢，其中前鋒艾華路莫拉達大打爭氣波，開波冇耐就食詐胡，但之後多得簡達華5秒內2度派膠，送禮畀車仔開紀錄。呢名擁有超過50頂意大利喼帽嘅國腳級球員，先撻Q後太老定被偷波，累國米肉酸失波。車仔最後射贏12碼擊敗藍黑兵團，堅要多謝簡達華。
今年31歲嘅簡達華，開波冇耐就睇到國米球迷嘔血。車仔當時於左路邊線擲界外球，簡達華右腳想解圍竟然撻Q，個波漏後畀莫拉達攞到，簡達華連隨食番該名西班牙射手身位，諗住等個波出底線。但好衰唔衰過份老定，畀莫拉達偷到個波硬抽，雖然國米門將救到，但就被柏度洛迪古斯補中，車仔半場領先1球。換邊後國米雖然追成平手完場，但射12碼車仔贏5:4，繼擊敗珀斯光輝後又贏一場。
東網體育FB同你追實體壇每個精彩時刻！