【邪神邏輯】中國辦世盃預埋香港呀
20180731
東網電視
更多新聞短片
(互聯網)
俄羅斯世界盃結束冇耐，內地傳媒又吹風，內容係話中國已將申辦世界盃放上議程，並鎖定2030年舉辦，雖然按照以往做法係各洲輪流舉辦，2022卡塔爾世界盃及2026北美世界盃之後，2030世界盃應該輪到歐洲舉辦，不過既然沙漠都搞得世界盃，國際足協睇錢份上，中國想搞冇話唔得嘅。
先講4年後嘅卡塔爾世界盃，賽期竟然係11月至12月，呢趟真係「世界大亂」，國際足協咁都得嘅話已經可以講係冇晒底線，仲有咩係唔得啫？所以2030年亦毋須排隊輪到歐洲，一於畀財力雄厚嘅中國打尖主辦，以中國財力，預算過千億真係濕濕碎，眉頭都唔會皺一下！
俄羅斯世界盃雖然冇中國隊，但據說中國贊助商、中國球迷同消費力都係頭幾位，可惜中國隊(國足)唔爭氣，除咗2002日韓世界盃外，每屆都出唔到線，而且睇走勢未來12年都冇乜出線可能，早排有個廣告幻想國足喺2033年稱霸全球，但邊有可能吖？不過如果中國取得主辦權，國足就自動入圍，到時國足擁躉就有排J啦。
中國近年舉辦嘅大型國際盛事，只有2008北京奧運，相信大家仲記得香港當年有份參與協辦馬術賽事，按照呢個邏輯，今次中國申辦世界盃嘅官員記得加埋香港落去，除咗香港大球場之外，到時我哋仲有個啟德體育園區，唔止搞小組賽，搞埋8強或4強都無問題。
東網體育FB同你追實體壇每個精彩時刻！
Follow東網體育IG一齊撐本地運動員！