【不斷更新】無驚無險 車仔三球食「哈」
20180811
東網電視
更多新聞短片
（Getty Images）
【23:49】【全場完】哈特斯菲爾德 0:3 車路士
車路士英超新季首戰作客哈特斯菲爾德，夏薩特任後備，泰拔高圖爾斯會已轉，新帥沙利嗰套究竟Work唔Work？今仗完全未睇到。哈特斯攻力曳到震，身價高達7160萬鎊嘅全球最貴門將阿列沙巴拿加毫無考驗，車仔縱未上力攻門唔多，但仍憑尼高路簡迪、佐真奴派路同柏度洛迪古斯建功，輕取3:0全取3分。
【23:37】哈特斯菲爾德 0:3 車路士
車仔三粒！柏度右路窄位射破對手大門，車仔三分冇走雞喇
【23:28】72分鐘，哈特斯死球斬入禁區頭槌攻門，最貴門將阿列沙巴拿加托出底線！
【23:12】下半場打咗10分鐘，車仔歎慢板，但角球有威脅，魯迪加一頂被撲出，跟手角球魯迪加二傳，阿朗素車身左腳一抽中楣
【22:47】【半場完】哈特斯菲爾德 0:2 車路士
車仔作客哈特斯菲爾德，半場實際威脅埋門唔算多，好彩連簡迪都識入波，撻大Q錯有錯着，去到完半場前仲有新將佐真奴入12碼拉開比數。哈軍雖然半場落後兩球，但唔算踢得曳，希望換邊後射多兩腳，等球迷睇吓全球最貴門將阿列沙巴拿加嘅身手！
【22:45】哈特斯菲爾德 0:2 車路士
阿朗素殺入禁區被主隊守衞踢跌，球證畀12碼，佐真奴主射搞掂，車仔兩粒！
【22:37】37分鐘，哈軍角球斬中撐後，穆尼爾一頂中柱，慘呀！
【22:34】哈特斯菲爾德 0:1 車路士
34分鐘車仔入波喇，韋利安左路傳中，尼高路簡迪遠柱射門撻晒Q，但都照樣入網，1:0！
【22:30】30分鐘，哈軍壓住嚟踢，雖然冇咩射門，但車仔作客嚟到冇甜頭
【22:26】哈軍前鋒穆尼爾再試遠射，僅僅高出。
【22:19】阿列沙巴拿加一次大腳解圍，卻畀對方截到，幸好佢亦接實對方嘅遠射，將功補過。
【22:04】車路士中場巴克里快射僅僅斜出。
【22:00】哈特斯菲爾德主場對車路士開波喇。
【21:28】10點開波嘅車路士作客哈特斯菲爾德公布正選陣容，剛以破全球最高身價守門員紀錄嘅西班牙門將阿列沙巴拿加，將會穿起1號波衫打正選，另一位新兵佐真奴費路亦首次喺英超亮相，上季中加盟冇咩機會落場嘅巴克里亦獲得新帥沙利信任，借將高華錫今仗仲未得，夏薩特就先做後備。
哈特斯菲爾德方面，新加盟嘅門將咸馬將把守最後一關，另一新兵來自摩納哥嘅干高路則夥拍基斯杜化舒捷拿扼守中路。
哈特斯菲爾德正選陣容(4-4-2)
門將：12咸馬
後衞：25真卡佐真遜、5干高路、26基斯杜化舒捷拿、33夏達干拿積
中場：15基斯路維、8菲臘標寧、6莊拿芬賀治、10阿倫穆爾
前鋒：24穆尼爾、21阿歷士柏列查特
車路士正選陣容(4-3-3)
門將：1阿列沙巴拿加
後衞：28艾斯派古達、30大衞雷斯、2魯迪格、3馬高斯阿朗素
中場：8巴克里、5佐真奴費路、7尼高路簡迪
前鋒：11柏度洛迪古斯、29艾華路莫拉達、22韋利安
【21:24】【全場完】紐卡素 1:2 熱刺
熱刺贏紐卡素完全唔奇，但只要你睇過戰情，就知熱刺贏得極度有運！英超周六早場，熱刺去到喜鵲地頭幾乎出盡世盃腳，哈利卡尼、迪利阿里、艾歷迪亞、洛里斯落齊，其中維頓漢及阿里更有波入。但幾名英格蘭國腳根本未抖夠狀態不足，卡尼冇腳好波、阿里被換走、迪亞更踢到抽筋，若非紐記之後射中一柱一楣，熱刺贏唔到2:1。今場係三分落袋，但之後可話有排捱，嚟緊下場對富咸之後，第三輪就要大戰曼聯，熱刺未必以好似今場咁好運。
【21:12】85分鐘，荷西朗頓勁射，省到賓戴維斯之後中楣，慘呀！
【21:07】熱刺換入孫興民，紐記就換入武藤嘉紀，韓日打吡呀喂！
【21:04】77分鐘，荷西朗頓埋門又過唔到洛里斯
【20:57】熱刺作出今場第一個調動，迪比利入替盧卡斯莫拉；紐卡素亦有基斯甸艾素入替馬特列治。
【20:49】紐卡素換入新加盟嘅荷西朗頓，一次角球攻勢做成門前混戰，又係差少少。
【20:36】50分鐘，卡尼門前又撻Q，迪利阿里趕到，門前竟然膝頭撞到個波，連環甩轆呀！
【20:35】
下半場一開波，紐卡素即有黃金機會，迪亞美禁區內左腳勁射中柱不入。
【20:17】【半場完】紐卡素 1:2 熱刺
對於新季首仗聯賽，熱刺非常重視，領隊普捷天奴幾乎出番晒一眾世盃腳，其中哈利卡尼、迪利亞里、迪利亞里、維頓漢全部正選，其中維頓漢同迪利亞里都有波入，唔到你唔服。隊長卡尼狀態未足，上半場冇咩表現，就睇吓下半場有冇波入喇。紐卡素上半場表現都唔曳，艾約斯佩雷斯仲爭啲扳平，下半場有得打！
【20:09】
紐卡素中堅施亞蘭奇勒接應罰球近門快射，空晒艾約斯佩雷斯遲一步未能補多腳撞入。
【19:48】紐卡素 1:2 熱刺
熱刺右閘奧里亞斬入禁區，迪利阿里入楔頭槌建功，熱刺再度領先。
【19:41】紐卡素 1:1 熱刺
紐卡素前鋒祖斯盧辛馬田冇人看管下頂入，3分鐘後即為主隊追和。
【19:38】紐卡素 0:1 熱刺
熱刺後衞達雲臣山齊士頂向門前，維頓漢加多一頭先開紀錄。
【19:30】
紐卡素對熱刺開波喇。
【18:45】紐卡素Vs熱刺陣已出，熱刺為打響頭炮，領隊普捷天奴唔理咁多，幾乎出盡主力世盃腳，當中哈利卡尼、迪利亞里、艾歷迪亞、維頓漢都正選落場，堅搏！
紐卡素正選陣容（4231）
門將：12杜巴夫卡
後衞：22耶迪連、6拿修斯、2施亞蘭奇勒、3杜密特
防中：8舒維爾、10迪亞美
中場：11馬特列治、17艾約斯佩雷斯、15羅拔堅尼地
前鋒：21祖斯盧辛馬田
熱刺正選陣容（4231）
門將：1洛里斯
後衞：24奧里亞、6達雲臣山齊士、5維頓漢、33賓戴維斯
防中：15艾歷迪亞、17穆沙施素高
中場：27盧卡斯莫拉、23基斯甸艾歷臣、20迪利阿里
前鋒：10哈利卡尼
新季英超強勢殺到，周五深夜曼聯出完場後，今晚就有熱刺同車路士，其中熱刺將於早場7點半作客紐卡素，晏少少10點車路士就作客哈特斯菲爾德。呢對倫敦勁旅，今夏一對就變到天翻地覆，一對就以不變應萬變，其中車仔轉領隊之餘，王牌夏薩特又希望離隊，就算簽入全球最貴門將阿列沙巴拿加，似乎車迷都冇信心。熱刺就創下由2003年以後，夏季轉會窗一人不簽嘅紀錄，以原班陣容應付新球季，想知兩軍新季打成點，一定要黐住《東網體育》，因為今晚我哋會跟足兩場賽事，為大家不斷更新戰情！
東網體育FB同你追實體壇每個精彩時刻！