【有片】小白日職世界波 媲美柏金經典

20180811
東網電視
更多新聞短片
(互聯網)
恩尼斯達射入日職第一球,講真都係遲早嘅事,但球波靚到咁,就一定要話畀大家知!周六日職神戶勝利船主場贏磐田山葉2:1,「小白」演出勁到暈,接應普多斯基質個靚直線,佢入楔時間靚不特止,仲要即刻嚟個超級轉身,搞到敵衞成個仆低,跟手再瀟灑過埋門將先抽個入網,一個字:超勁!
呢個完美入球,有一定波齡嘅球迷,必會諗起神鋒柏金嘅超級金球。01/02年英超球季阿仙奴對紐卡素,柏金入楔禁區背向龍門,先用左腳逗前,再逆向轉身繞過守衞,於門前輕鬆熨入,講難度的確係柏金嘅球難啲,但論瀟灑,「小白」呢球就有過之而無不及,總之兩個都勁,打和啦!Super!
「小白」賽後不忘多謝好拍檔普多斯基:「呢個波傳得好靚,我好開心能夠喺主場入波,我好希望透過全取3分,向聯賽發起挑戰。」
恩尼斯達同普多斯基合作嘅呢個靚波,唔只畀日本傳媒形容為「世界一組合」嘅傑作,仲帶挈埋同日正式開業嘅「恩尼斯達酒吧」大收旺場,好多人去試佢嘅自家品牌靚酒,同埋西班牙前菜開胃小食、亦係通常作為下酒菜嘅tapas同pinchos,真係乜都贏晒。
東網體育FB同你追實體壇每個精彩時刻!