卡尼沉到癲 熱刺幸勝紐記有排捱

2018年08月11日 21:23
東網電視
更多新聞短片
(Getty Images)

熱刺贏紐卡素完全唔奇,但只要你睇過戰情,就知熱刺贏得極度有運!英超周六早場,熱刺去到喜鵲地頭幾乎出盡世盃腳,哈利卡尼、迪利阿里、艾歷迪亞、洛里斯落齊,其中維頓漢及阿里更有波入。但幾名英格蘭國腳根本未抖夠狀態不足,卡尼冇腳好波、阿里被換走、迪亞更踢到抽筋,若非紐記之後射中一柱一楣,熱刺贏唔到2:1。

熱刺一開波即搶攻,僅8分鐘達雲臣山齊士頭槌攻門,維頓漢於門前加多頭,個波啱啱過咗白界,率先打開紀錄。去到11分鐘,主隊嘅馬特列治妙傳祖斯盧辛馬田頂入扳平,可惜7分鐘後,熱刺右閘奧里亞斬入禁區,迪利阿里入楔頂成2比1,再度領先。

下半場熱刺就愈踢愈攰,其中卡尼沉到嘔,曾於禁區有機起腳,但就撻晒Q,狀態不足嘅阿里趕到亦慢一步,膝頭撞高個波畀對手門將接實。紐卡素之後佔到上風,先有迪亞美於禁區內左腳勁射中柱彈出,之後再有空晒嘅羅拔堅尼地於左路窄位抽射,但過唔到及時出迎嘅熱刺門神洛里斯,想補射又畀客軍後衞護到空門,末段後備入替嘅新兵荷西朗頓勁射,省中維頓漢改善方向再中楣,認真冇運。今夏勇奪世盃金靴嘅哈利卡尼明顯冇態,亦將自己8月英超食白果嘅魔咒延續至14場。

熱刺因為起新球場使咗勁多錢,所以今個夏天竟然一個人都冇買,創下2003年以來,英超首支於夏季轉會窗零買人嘅紀錄,今次卡尼、阿里、迪亞洛里斯回歸球隊不足一周,今場就要打正選,就知道熱刺幾咁唔夠人。今場係三分落袋,但之後可話有排捱,嚟緊下場對富咸之後,第三輪就要大戰曼聯,熱刺未必以好似今場咁好運。

東網體育FB同你追實體壇每個精彩時刻!
http://bit.ly/2ecTF2A