最貴門將零考驗 車仔未上力照贏3粒

2018年08月11日 23:50
東網電視
更多新聞短片
(Getty Images)

車路士英超新季首戰作客哈特斯菲爾德,夏薩特任後備,泰拔高圖爾斯會已轉,新帥沙利嗰套究竟Work唔Work?今仗完全未睇到。哈特斯攻力曳到震,身價高達7160萬鎊嘅全球最貴門將阿列沙巴拿加毫無考驗,車仔縱未上力攻門唔多,但仍憑尼高路簡迪、佐真奴派路同柏度洛迪古斯建功,輕取3:0全取3分。

上周社區盾輸波嘅車仔,近日打破全球門將最高轉會費紀錄簽入畢爾包23歲門將阿列沙巴拿加代替離隊嘅泰拔高圖爾斯,勢估唔到呢位初到貴境嘅英超標王,今仗即刻打正選,不過佢未受考驗。34分鐘車仔前鋒柏度洛迪古斯於中場逼搶成功,妙傳韋利安於左路落底線,尼高路簡迪門前撻Q反而笠死主隊門將咸馬。車仔得勢不饒人,完半場前馬高斯阿朗素殺入禁區被對方掃跌,球證直指12碼點,新兵佐真奴費路操刀射成2比0,取得加盟車仔後首個士哥。易邊後哈軍反撲乏力,車仔亦歎慢板,最後憑柏度完半場入多球,車仔贏3:0完場。

睇咗90分鐘,阿列沙巴拿加出迎非常果斷,上半場兩次出迎時間都好準,換邊後救個近門頭槌反應亦快。車仔下輪主場對阿仙奴,到時阿列沙巴拿加將迎來真正考驗。

東網體育FB同你追實體壇每個精彩時刻!
http://bit.ly/2ecTF2A