利物浦對晒辦 文尼入兩粒仲堅過沙拿

2018年08月12日 22:24
東網電視
更多新聞短片
(Getty Images)

今晚英超頭場之一,今夏大豪客利物浦都未出晒一眾新兵,淨番靠上季弗爆3叉戟,就清風送爽喺主場大勝「錘仔幫」韋斯咸4比0,盡顯霸氣,連省2粒嘅沙迪奧文尼,更係繼名宿班尼斯之後,成為另一位連續3季喺聯賽首輪都有士哥嘅紅軍球員,證明主帥高普真係大把籌碼喺手。

上季聯賽4哥、歐聯亞軍嘅利物浦,今夏痛定思痛狂使1.64億鎊買人,簽入梳頓沙基利、法賓奴泰華利斯、拿比基達同貴價門神艾利臣比加,主帥高普講到明今季要捧盃,決心十足,不過佢今仗先收起前2者,只讓拿比基達同艾利臣比加擔正。雖然未有用盡晒班新兵,而韋斯咸今夏都使咗近9000萬鎊增兵唔嘢小,但利物浦一開波即撳住搶,上季弗爆3叉戟穆罕默德沙拿、羅拔圖法明奴、沙迪奧文尼依然搶鏡,19分鐘,安德魯羅拔臣左路橫傳,沙拿近門撞入,呢位上季英超金靴得主先開紀錄。

紅軍入波後得勢不饒人,完半場前又係安德魯羅拔臣左路出波,中間冇人頂到,反而漏過畀占士米拿於右路落底線,文尼門前整多粒,亦令佢繼名宿班尼斯之後,成為另一位連續3季聯賽首輪有士哥嘅紅軍球員,認真威水。

易邊後利物浦未有鬆懈,53分鐘輪到法明奴發難,佢直線妙傳文尼射成3比0,不過呢球文尼明顯係越位,球證卻發雞盲睇唔到,睇嚟紅軍幾有運喎。直至末段,主帥高普先換入另一名新兵梳頓沙基利輕舒步頭,之後史杜列治整多粒,最終紅軍大炒4比0,旗開得勝,贏得咁輕鬆,證明高普真係大把籌碼喺手。


東網體育FB同你追實體壇每個精彩時刻!
http://bit.ly/2ecTF2A 

Follow東網體育IG一齊撐本地運動員!
http://bit.ly/2EYxoRh