【不斷更新】曼城2蛋爆廠新季響頭炮
20180813
東網電視
更多新聞短片
(Getty Images)
【0:54】全場完 阿仙奴 0:2 曼城
阿仙奴換湯換帥唔換藥呀！英超開鑼首周重頭戲，由阿仙奴主場對曼城。有地利嘅「兵工廠」今場喺新帥艾美利領導下首度於英超出師，可惜踢落仍未擺脫上季頹風，冇前冇後，面對衞冕嘅曼城完全唔夠砌，客隊憑住史達寧同貝拿度施華上下半場各建一功，以2比0輕勝，打開勝利之門。至於輸波嘅「兵工廠」落筆打三更，首戰3分全失，新季前景令人擔心。
【0:38】
78分鐘，阿仙奴入波喇！奧巴美揚接應妙傳單刀挑入......可惜，佢越位在先，唔計數呀！
【0:23】
63分鐘，曼城把握阿仙奴後防犯錯，前鋒阿古路單刀竟畀施治救出。不過唔使1分鐘，曼城又有攻勢，貝拿度施華接應傳中，離門14碼左腳勁射破網，曼城贏到2比0。
【0:19】
59分鐘，曼城被搶得犀利，哥迪奧拿決定以奇雲迪布尼入替新兵馬列斯，增強活力。
【0:14】
54分鐘，阿仙奴以拿卡錫迪入替艾朗藍斯，實行打多個前鋒，似係想同曼城搏命喎！1分鐘後，呢位法國前鋒禁區邊幾乎得手，「半窩利」僅僅射斜。
【23:51】阿仙奴 0:1 曼城
半場完，曼城憑史達寧入靚波，上半場領先阿仙奴1:0，查實曼城於上半場控制戰局，新兵馬列斯之後幾次射波幾乎得手，若非主隊門將施治左飛右撲，阿仙奴隨時已落後2至3粒，睇吓下半場新帥艾美利有冇計仔，為阿仙奴扭轉劣勢。
【23:41】
馬列斯於右路空晒，扣番大位抽射，僅僅出界。
【23:35】
美蘭尼爾斯傷出，由新加盟嘅老將列治史迪拿入替。
【23:27】
馬列斯妙射罰球，好彩阿仙奴門將施治救出，拿樸迪再補射，又過唔到施治。
【23:20】
阿仙奴右閘比利連於右路勁射，可惜射得太正畀艾達臣摩拉斯撲出。
【23:14】阿仙奴 0:1 曼城
曼城翼鋒史達寧於禁區外遠射靚波先開紀錄。
【23:00】阿仙奴主場對曼城開波喇。
【21:50】11點開波嘅，仲有重頭戲阿仙奴主場同曼城上演「廠城戰」，其中兩軍正選名單已經公布。主隊阿仙奴新兵今夏由法乙羅連安特引入嘅新仔古安杜斯，開咧大戰就坐正中場正選位置，搭住格列沙加，睇嚟新廠長艾美利真係諗住出奇制勝。而另一位中場新兵盧卡斯托拉拿就要坐住喺後備席。
而曼城方面，領隊哥迪奧拿繼續沿用社區盾一役嘅正選右路攻擊組合，有新兵馬列斯同貝拿度施華齊齊拍檔，另外英格蘭攻擊手史達寧都會正選上陣，搭住箭頭人物阿古路。
阿仙奴正選陣容（433）
門將：1施治
後衞：2比利連、20梅斯達菲、5柏柏斯達夫普路斯、15美蘭尼爾斯
中場：29古安杜斯、34格列沙加
攻中：7米希達利恩、10奧斯爾、8艾朗藍斯
前鋒：14奧巴美揚
曼城正選陣容（443）
門將：31艾達臣摩拉斯
後衞：2基爾獲加、5史東斯、4拿樸迪、22班捷文文迪
中場：20貝拿度施華、25費蘭甸奴、8根度簡
前鋒：26馬列斯、10阿古路、7史達寧
【22:23】【全場完】利物浦 4:0 韋斯咸
季前重金買人嘅利物浦，開咧戰正選陣容只係派出拿比基達一人，就成功靠一班沙拿同文尼等上季骨幹，4比0橫掃韋斯咸，搶得賽季首勝，艾利臣比加喺後場可以話一啲考驗都冇，可以見到紅軍呢班球員都仲有貨，嚟緊表現值得期待。
【22:15】利物浦 4:0 韋斯咸
史杜列治換出沙拿之後真係夠運！唔夠一分鐘就接應角球門前撞入，為利物浦將領先優勢擴大到4比0，似乎大局已定。
【22:12】
利物浦優勢明顯，領隊高普見狀，都畀紅軍球迷期待已久嘅瑞士新兵梳頓沙基利上場，換出入球功臣沙迪奧文尼。
【21:58】
韋斯咸再有調動，換入烏克蘭新兵耶莫蘭高，換出阿拿奧杜域；而利物浦贏住3球都收韁，換出羅拔圖法明奴，換入隊長佐敦軒達臣加強中場防守。
【21:49】
韋斯咸攻極都冇料到，領隊比歷連尼仲於忍唔住撳制，換入「小豆」查維亞靴南迪斯加強攻力。
【21:39】利物浦 3:0 韋斯咸
利物浦上半場贏住2球之後，下半場一返到嚟得勢不饒人，靠文尼接應羅拔圖法明奴直線傳送，喺有越位嫌疑之下，射入利物浦第3球，個人成功梅開二度。
【半場完】利物浦 2:0 韋斯咸
利物浦半場除咗場面上全面壓制對手韋斯咸之外，比數上都已經取得2比0領先優勢，多得沙拿同文尼兩位上季嘅進攻拍檔齊齊建功，加上新兵拿比基達表現對辦，帶領紅軍頻頻打出具立體感嘅進攻，氣勢咁猛，下半場再有波入都唔奇。
【21:17】利物浦 2:0 韋斯咸
安德魯羅拔臣左路傳中，中間冇人頂到，反而漏過畀占士米拿於右路再回傳入中間，文尼門前執雞整多粒。
【21:08】
文尼右路落底線，沙拿近射幾乎整多粒，法比安斯基竟神奇救出。
【20:54】
阿歷山大阿諾特主射罰球直飛死角，但畀法比安斯基飛身撲出。
【20:50】利物浦 1:0 韋斯咸
安德魯羅拔臣左路橫傳，沙拿近門快射得手，先開紀錄。
【20:48】
占士米拿右路傳中，但3叉戟沙拿、法明奴及文尼都來遲半步。
【20:46】
紅軍前鋒文尼突破越位，但韋斯咸門神法比安斯基快一步出迎救出。
【20:38】
紅軍王牌沙拿妙傳法明奴，可惜推波大力得滯，畀對方後衞解圍。
【20:30】
利物浦主場對韋斯咸開波喇。
【19:45】利物浦VS韋斯咸陣已出，紅軍除咗有上季堅勁3叉戟穆罕默德沙拿、羅拔圖法明奴同沙迪奧文尼助陣外，新兵艾利臣比加、拿比基達都齊齊亮相。「錘仔幫」都有韋舒亞同菲臘安達臣等矚目新兵擔正，配合射手阿拿奧杜域，隨時同紅軍大駁火！
利物浦正選陣容（433）
門將：13艾利臣比加
後衞：66阿歷山大阿諾特、4華基爾雲迪積克、12祖高美斯、26安德魯羅拔臣
中場：5韋拿杜姆、8拿比基達、7占士米拿
前鋒：11穆罕默德沙拿、9羅拔圖法明奴、10沙迪奧文尼
韋斯咸正選陣容（3421）
門將：1法比安斯基
後衞：4法比安巴貝拿、21奧邦拿、41迪格蘭賴斯
中場：24賴恩費特歷斯、19韋舒亞、16麥克盧保、26馬蘇亞古
攻中：30米查利安東尼奧、8菲臘安達臣
前鋒：7阿拿奧杜域
新季英超激戰連場，繼尋晚倫敦雙雄熱刺同車路士齊齊出場兼贏波後，今晚就有利物浦、阿仙奴同曼城，其中利物浦將於頭場8點半主場對韋斯咸，晏少少11點就有今輪重頭戲，阿仙奴主場硬撼上季盟主曼城。利物浦今夏做咗大豪客，狂使1.64億鎊買人，包括簽入艾利臣比加、法賓奴泰華利斯同梳頓沙基利等，主帥高普講到明要攞冠軍，不過「錘仔幫」都使咗近9000萬鎊增兵，仲有「智利工程師」比歷連尼領軍，唔係冇得打。至於阿仙奴踏入後雲格時期，新帥艾美利銳利改革，羅致列治史迪拿、盧卡斯托拉拿等實力派，應有一番新景象，不過曼城以不變應萬變，只簽入馬列斯，以原班陣容應付新球季，想知兩軍碰頭會否擦出火花，一定要黐住《東網體育》，因為今晚我哋會跟足兩場賽事，為大家不斷更新戰情！
東網體育FB同你追實體壇每個精彩時刻！