【衰過雲格】新廠長唔掂 吞曼城2蛋陰功豬

2018年08月13日 00:59
東網電視
更多新聞短片
貝拿度施華為曼城鎖定勝局。(法新社圖片)

阿仙奴換湯換帥唔換藥呀!英超開鑼首周重頭戲,由阿仙奴主場對曼城。有地利嘅「兵工廠」今場喺新帥艾美利領導下首度於英超出師,可惜踢落仍未擺脫上季頹風,冇前冇後,面對衞冕嘅曼城完全唔夠砌,表現仲衰過雲格年代,新季前景令人擔心。客隊憑住史達寧同貝拿度施華上下半場各建一功,以2比0輕勝,順利打開勝利之門。

今場上半場以曼城形勢佔優,佢哋打到14分鐘就有史達寧禁區頂射靚波入網領先。之後曼城仲有新兵馬列斯幾次射門勁有威脅,若非阿仙奴門將施治表現神勇,半場肯定唔止失1球。至於「兵工廠」上半場就只有比利連禁區內勁射較有威脅,但都逃唔出曼城新門將艾達臣摩拉斯十指關,半場曼城領先1比0。

換邊後冇耐,「兵工廠」換入前鋒拿卡錫迪企圖加強鋒力,點知仲未追番,曼城喺63分鐘先有阿古路單刀失機,但1分鐘後,貝拿度施華離門14碼接應班捷文文迪左路傳中,第一時間撞射掛網,「藍月亮」贏到2比0。

之後阿仙奴積極反撲,踢到78分鐘仲有奧巴美揚單刀挑入,只可惜被判越位在先,慘食詐胡。餘下時間,阿仙奴始終無力破蛋,曼城都收夠籌,保住2球優勢完場,順利打響頭炮。