【雅加達直擊】男足小組排第2 女籃慘敗
20180815
東網電視
更多新聞短片
陳俊樂（6號）及佐迪（18號）同樣梅開二度，勁呀！（法新社）
【23:00】
睇完港足的A組，其他組別都爭持激烈，南韓U23周三晚首度亮相雅加達亞運，雖然主將孫興民並無披甲，另兩名外流前鋒黃喜燦、李勝佑亦只是後備上陣，依然大炒巴林6比0，在E組旗開得勝。
「太極虎」主帥金鶴范此戰排出3-5-2陣式，力求控制中場，結果順利壓制對手，偏偏巴林亦不知收歛，與南韓展開對攻，終於釀成一場慘敗。效力日職大阪飛腳的南韓鋒將黃義助，單在上半年已經上演帽子戲法，協助球隊領先4比0返回更衣室。易邊後，南韓略為放鬆，仍能多入兩球，其中黃喜燦更於93分鐘利用自由球埋齋，令這支爭金熱門輕鬆全取3分。
【22:00】
有歸化前鋒Alberto Gonçalves da Costa養傷的印尼U23，周三晚出乎人意，以1比2不敵巴勒斯坦，令對手以3戰得7分高踞男子足球A組首位，香港隊則以6分排第2。港隊小組最後兩場賽事對手，正正是巴勒斯坦及印尼。
【20:12】睇完香港男足，其實香港女籃今日喺雅加達GBK Basket Hall都有首場比賽，由卓婷帶領一眾隊員挑戰日本女籃。對手速度及技術都相當強勁，雖然港隊出盡全力頑抗，有李祉均射入13分，而卓婷亦有10分進帳，但可惜最終都以44比121落敗。一眾隊員今場領教亞洲強隊威力，絕對學到嘢。港將亦會收拾心情，迎接17號對蒙古的賽事，因為如果來仗贏波，就有機會晉級次輪，香港女籃加油呀！
【18:52】
全場打完，香港U23代表隊喺全場佔盡優勢之下，憑陳俊樂同超齡前鋒佐迪齊齊梅開二度，以4比0大勝中華台北。香港至今2戰全勝得6分，攀上榜首，出線形勢樂觀。至於中華台北則係3戰得1分，睇怕都好難翻身。
【18:46】
88分鐘，中華台北守將趙明修惡意犯規，領得今場個人第二黃，變成一紅被逐離場打少個。
【18:35】
77分鐘，港隊前場右路罰球，姚浩明勁射被中華台北門將手槌打出。
【18:29】
70分鐘，陳俊樂接應角球，近門倒掛僅僅高出，幾乎中三元呀！
【18:24】
66分鐘，香港再以趙少維入替佐迪，接連收起兩名超齡球員，畀佢哋抖抖，都畀機會新球員。
【18:14】
下半場打咗11分鐘，雙方都冇乜入肉攻勢。56分鐘，香港收起林嘉緯抖抖，由姚浩明入替。
【17:48】
上半場打完，港隊佔到一面倒優勢，尤其開賽僅只9分鐘內，便先後憑陳俊樂及佐迪頭槌及單刀各省一粒，領先2比0。之後兩軍陷於拉鋸局面，但港隊沉着應戰，直到38分鐘及42分鐘，又一次係樂仔同佐迪輪流建功，結果香港半場領先4蛋，睇落堅係勝券在握。
【17:42】香港 4比0 中華台北
42分鐘，香港左路又一次突破越位，林衍廷左路地波傳中，佐迪門前撞射入網，連佢都省兩粒，贏到4比0。
【17:38】香港 3比0 中華台北
38分鐘，香港前場左路手榴彈戰術，直接掟波入小禁區，伏兵門前嘅陳俊樂又一次頂入，個人梅開二度，香港贏到3比0。
【17:24】
23分鐘，陳俊樂前場右路突破越位，趁中華台北門將出迎，冷靜通「大細」傳中，但喺佐迪接應之前，畀中華台北球員及時解圍踢出底線。之後港隊右路角球傳中，劉學銘門前頂高。
【17:10】香港 2比0 中華台北
9分鐘，香港前鋒佐迪突破越位單刀射入，贏到2比0。
【17:06】香港 1：0 中華台北
開賽4分40秒，港隊左路界外球手榴彈，陳俊樂把握中華台北守將頭槌解圍失誤，近門頂入，為港隊先開紀錄。
【16:37】
出戰雅加達亞運男足的香港U23代表隊，今日將會進行佢哋喺A組嘅第2場分組賽。之前港隊首戰以3比1擊敗老撾，旗開得勝，今日次輪會乘勝追擊之前小組兩戰只得1分嘅中華台北。依家就快開波，兩軍已經公布陣容，我哋《東網體育》特派記者袁志浩已經抵達雅加達，為大家全程直擊今場戰況，帶畀大家港隊第一手消息，各位記得緊跟呢個Post呀！
香港隊陣容
門將：袁皓俊
後衞：劉學銘、列斯奧、徐宏傑
中場：謝朗軒、陳俊樂、林嘉緯、胡晉銘、林衍廷
前鋒：鍾偉強、佐迪
中華台北陣容：
門將：潘文傑
後衞：徐宏銍、王睿、陳庭揚、黃祥哲
防中：趙明修、周宇杰
中場：游家煌、衞懋庭、陳昭安
前鋒：李祥偉