【皇馬災難】輸世界波 馬體會捧歐超盃
20180816
東網電視
更多新聞短片
（法新社圖片）
延伸閱讀：【兜頭勁踢拉莫斯 迪哥贏盃兼攞彩】
皇馬加時畀世界波射死，馬體會擊敗死敵捧歐洲超級盃！上屆歐聯冠軍皇馬對戰上屆歐霸盃盟主馬體會，今戰係銀河艦隊於「後C朗時代」首場正式賽事，點知1分鐘就失守，迪亞高哥斯達怒射先開紀錄。雖然皇馬之後有賓斯馬建功及隊長沙治奧拉莫斯轟入12碼，但迪哥再入一球扳平打加時。於加時階段馬體會蹂躪皇馬，沙奧尼古斯球不着地抽入世界波，加上高基奠勝，馬體會贏4:2捧盃，皇馬連續三屆奪歐超盃夢碎，唔知佢哋有冇掛住C朗呢？
馬體會今戰有基沙文及迪哥於前線掛帥，皇馬新帥洛佩特吉亦派出加里夫巴利、賓施馬、馬高阿辛斯奧、艾斯高等打正選，雙方均精銳盡出。開波1分鐘迪哥頭槌頂贏拉莫斯，壓入禁區窄位射破基羅拿華斯十指關，火速打開紀錄。皇馬企穩陣腳後狂攻，27分鐘巴利右路出波，賓施馬伏兵遠柱頂入，半場打成1:1平手。
換邊後皇馬稍佔優勢，63分鐘獲得12碼，拉莫斯冷靜射入為皇馬反超前，慶祝時學拳擊狂人麥基哥雙手擺吓擺吓勁招積。不過皇馬之後再一次睇唔實迪哥，79分鐘呢個大隻射手門前撞入，將比賽帶入加時階段。馬體會於法定時間後明顯弗過皇馬，前場瘋狂迫搶令皇馬後防大亂，湯馬士柏迪左路妙傳，沙奧尼古斯趕到左腳球不着地勁射入網，馬體會再一次領先。隨後高基接應馬捷恩佩雷斯橫傳第一時間抽入，馬體會贏4:2捧走歐超盃，贏得極有說服力。
東網體育FB同你追實體壇每個精彩時刻！