【神邏輯】寸王:普巴冇話走 即係想留!

2018年09月15日 07:14
東網電視
更多新聞短片
(Getty Images)

曼聯領隊莫連奴,或者係有被害妄想症,周時覺得被整個英國針對。於今輪英超對屈福特嘅記者會,寸王又再爆Seed勁變金句王,除羅列大量數據反駁福仔並非冇上陣時間外,對普巴去留問題又大玩語言偽術,表示呢名法國世界盃冠軍功臣,從來冇同自己講過想離隊,換句話講即係想留隊。

普巴自上季開始就同寸王唔咬弦,雙方關係愈變愈曳;今季曼聯出閘脫腳,令寸王帥位不穩,更加令莫連奴神經緊張,到依家又被問到福仔上陣時間,以及普巴去留等敏感話題,寸王毫不留情去到盡,記者會氣氛劍拔弩張。

「自世界盃後普巴同我對咗大約兩個月,佢從來冇講過話想走。呢個係我唯一認知嘅事實,而唔係我聽到,或於報章上讀到嘅。亂講嘢同亂作嘢嘅人同我毫無關係,我同球員嘅相處先係真實。普巴,冇講過話要離隊。」

對被問到普巴係咪想留隊,寸王話:「佢冇講話走,即係佢想留低,呢個就係我嘅結論。」

但普巴話講過未來嘅嘢好難講喎,寸王就咁答:「咁你要問番佢,呢個係佢同傳媒講嘅答案,唔係同我講嘅答案,所以我不作評論。」

東網體育同你追實體壇每個精彩時刻! 
https://goo.gl/ewVpvE