踢國際賽玩埋走私 戴巴拿一身蟻

20180915
東網電視
更多新聞短片
阿根廷國腳變晒走私客!據西班牙《阿斯報》報道,阿根廷早前喺美國友賽危地馬拉同哥倫比亞期間,多名國腳喺美國瘋狂掃貨,買咗大量音樂器材、玩具同電子產品,入晒箱帶番去阿根廷。不過,呢班國腳並冇為呢批總值約18,000英鎊嘅貨物報關,懷疑想走私逃稅。
阿根廷海關已經將呢批走私貨扣起,並且轉介阿根廷檢察部門跟進,雖然明知物主係鼎鼎大名嘅球星,但阿根廷稅務機關AFIP一樣唔畀面,公開宣布「扣查咗阿根廷國家隊一批電子產品」。據AFIP公開嘅相片所見,多個印住號碼嘅貨箱被扣查,當中包括保羅戴巴拿嘅21號、基奧雲尼施蒙尼嘅19號等等。
阿根廷足總其後出面澄清,話嗰批電子儀器係視頻分析同運動機械學設備,通常用喺比賽及訓練,仲提交咗證明文件。由於涉及嘅行李多達11箱,海關仲要逐一核對,睇吓係咪事實,班國腳有排都未攞得番啲嘢。
東網體育FB同你追實體壇每個精彩時刻!