【有片】極殘暴！巴西球星發狂踢爆球證個頭

巴西日前一場室內足球賽出現超暴力場面，效力5人足球隊巴西人嘅中場馬些連奴，喺一場決賽入面因為唔服球證馬高斯判決，竟然先用頭槌頂跌馬高斯，繼而發狂將跌喺地嘅馬高斯頭部當成足球狂抽，呢次恐怖襲擊導致馬高斯頭顱骨裂，甚至乎有生命危險，馬些連奴亦被警方拘捕兼刑事檢控，極可能會面臨監禁處分。

呢場決賽富明尼斯以6比4擊敗巴西人，據報當富明尼斯射入第6球後，馬些連奴即向球證投訴對手犯規在先，不過馬高斯堅持判決，腦羞成怒嘅馬些連奴即失控造成今次慘劇。賽事因為呢次襲擊停頓16分鐘，馬高斯被送院後接受多次檢查，發現佢頭骨骨裂，一度有性命危險，不過搶救後暫時情況穩定，警方亦就事件展開刑事調查。

馬高斯嘅代表律師山度士向《環球體育》透露：「馬高斯受傷極嚴重，而且承受極大痛苦，根據當事人嘅受傷嚴重程度，可以會控告馬些連奴嚴重傷害他人身體，但一切都要等檢察官完成30日嘅調查先至決定，我哋依家只係希望馬高斯身體無恙。」

至於馬些連奴隨後亦發出道歉聲明：「如果人生可以逆轉5秒鐘，我一定會選擇(踢人)嗰5秒，呢件事唔應該發生，我亦冇諗過自己會咁做，好不幸事件真係發生咗。我做錯咗，而且會為呢個錯付出代價，雖然我仍然認為球證當時判決不當，但咁樣唔代表我有權傷害人，真係好對唔住。」

東網體育FB同你追實體壇每個精彩時刻！

http://bit.ly/2ecTF2A