【格仔醜聞】洛夫雲被控作偽證　或踎監5年

克羅地亞喺今夏世界盃雖然勇奪亞冠，不過一班國腳繼續受到國內足壇貪腐醜聞困擾，克羅地亞檢察部門宣布，佢哋正式檢控效力利物浦嘅中堅洛夫雲「作假證供」，將會同較早前被控同樣控罪嘅皇家馬德里中場莫迪歷一齊受審，至於審訊日期仍未決定，但消息指控罪一旦成立，2人將會面臨6個月至5年監禁。

今次事件涉及克羅地亞足球史上最大型貪腐案，做過薩格勒布戴拿模副主席同克羅地亞足總副會長嘅馬米，被指喺洛夫雲2010年由薩格勒布戴拿模轉會里昂期間，非法將一半轉會費據為己有，馬米喺2015年被控貪污、逃稅及侵佔罪，莫迪歷同洛夫雲等多位國腳都被傳召上庭，不過2位球星嘅證供竟然係為馬米開脫。

馬米喺今年6月被判監6年半，喺法庭上突然改口供兼「玩失憶」嘅莫迪歷，率先被控作假證供，檢察部門到周四再宣布向洛夫雲作出相同控罪。洛夫雲隨即喺IG發聲明，表明自己「行得正企得正」，會為「家族名聲」打贏呢場官司。

不過，英國《衞報》透露，克羅地亞檢察官得到馬米嘅文件中，其中一份資格係佢教一眾被傳召球員點樣回答檢察官問話，而洛夫雲就完全「跟足指示」。據報有好多克羅地亞國民對於一班國腳非常反感，就係因為覺得佢哋喺庭上包庇「貪腐魔頭」馬米。

東網體育FB同你追實體壇每個精彩時刻！

http://bit.ly/2ecTF2A