賓利GT3上海爭霸 李英健 唐偉楓拆夥鍊過
20180921
東網電視
更多新聞短片
繼1月杜拜24小時耐力賽後，東網on.cc將再為本地車迷帶來緊張刺激的賽車直播，「寶珀GT亞洲系列賽」上海站明日起一連兩天舉行，多位香港著名車手包括李英健（Marchy）、歐陽若曦（Darryl）、方駿宇（Adderly）及唐偉楓（Shaun）等齊於上海國際賽車場馳騁，爭奪這項全球最大型GT錦標賽殊榮。去年Marchy與Shaun攜手勇奪賽事Silver Cup年度冠軍及GT3級別總季軍，今屆車隊換上全新戰車迎戰，希望再次為港爭光，喚起港人關注！
■圖/文：袁志浩
亞洲鳳凰車隊（Phoenix Racing Asia）去屆由兩位銀級車手李英健及唐偉楓合作，曾於上海站封王，最後總成績捧走Silver Cup錦標。不過今次車隊分別由Marchy配合馬來西亞前F1車手熊龍（Alex），Shaun夥拍曾參加紐柏格林24小時耐力賽的南非車手Jordan Pepper，以兩輛戰車的全新陣容參賽。
新拍檔盡展所長
Marchy指與Shaun「師徒拆夥」或更有利發揮，形容自己與Alex閱歷較多，組合以經驗搭夠，而Shaun和南非車手的配搭就在速度上有優勢。Shaun則認為這次在感覺及意義上都有不同：「唔再係跟住Marchy，今次係第1次同車廠車手合作，佢對車嘅認識比我多，試車時間亦同我唔一樣，大家都有不同優點，希望今次合作可以一齊進步，更上一層樓。」
更具新鮮感的是，車隊今屆改由駕駛賓利全新歐陸GT3賽車應戰，成為第3支代表賓利品牌征戰亞洲賽事的合作車隊，Marchy指出：「今時今日GT賽有好多唔同品牌，但賓利喺賽車界歷史非常悠久，喺勒芒24小時耐力賽亦創下好多輝煌成績，好開心可以有呢個合作機會。」
新車搭載4.0升雙渦輪增壓V8發動機，配備重新設計的乾式油底殼系統，並採用全新進氣及排氣系統，Shaun對此表示格外期待：「新車睇落同街車一樣，但其實好多零件同設計已經唔同，最特別係加入空氣動力裝置，煞車更加強，細節上要更留意，其他揸法都係大同小異，好期待佢帶畀我嘅成績！」
重返上海站力爭衞冕，新拍檔配搭新戰車下，Marchy希望盡量縮短適應時間，目標以前3名完成，誰知Shaun笑指「佢話要頭3名，咁我就梗係想贏喇！」，Marchy立即以「即係咩意思先！」還擊，讓現場充滿笑聲。Shaun其後補充稱，自己已準備就緒：「上年成績好所以有多少壓力，不過早前已經去英國試新車，架車好好，因此信心一定有，而成績就要睇臨場發揮。」
方駿宇返「主場」醒神
另一位香港車手方駿宇則代表Absolute Racing車隊繼續以Audi R8 LMS GT3戰車參賽，雖然Adderly今屆賽事多次因機件故障及意外錯失積分，不過他仍希望以最好成績完結賽事：「呢度係F1賽道，大型錦標賽都一定設有一站，同其他場唔同，呢度好多連接入彎，難度好大，非常考驗技術。上海係我比較鐘意嘅賽車場，06年我就喺呢度開始賽車，成日都好想返去，當正係Home track相信發揮都特別好！」
「寶珀GT亞洲系列賽」一向吸引香港車手參加，Adderly認為賽事對本地車壇別具意義：「香港係亞洲中心，好多賽車場都接近，加上寶珀係大型賽事，身為香港車手都想成為世界級前列選手。賽車唔同籃球同游水咁講身形，香港人都可以得到好成績，每次參賽都期望可以畀到動力下一代，去接棒為香港爭光。」
GT賽有評級鬥得更激
寶珀GT系列賽於歐洲極受歡迎，去年賽事進軍亞洲，短短兩年間已高速擴展，各國知名車手爭相參賽，加上GT4新平台於近年冒起，系列賽總經理Benjamin Franassovici表示：「賽事在馬來西亞、泰國、日本及中國都很受歡迎，觀眾愈來愈多，香港對我們亦很重要，因為很多車隊或車手的基地都在這裏，相信本地車迷都會受益。」賽事總監姚保羅補充，亞洲系列賽模式與歐洲相近，採用BOP平衡模式，令比賽更公平：「比賽分金、銀、銅級車手，不會出現『大蝦細』的情況，BOP亦會計算各種因素的組合變化去計算，大幅縮小各車廠廠車的差異，讓整個GT3賽事更加精彩及刺激。」
這次賽事將透過東網on.cc向廣大市民直播，李英健指賽事講求多項技術，希望大眾可從中多了解賽車：「這對推廣賽車很有幫助，車迷可透過這全球最大GT錦標賽，多接觸並認識GT賽事，了解賽事模式。GT賽事競爭性強大，一場比賽有30多輛車，有很多過車鏡頭，是個高水平賽事。1小時賽事內應何時出入維修站、換胎都有學問，整個過程爭分奪秒都是它吸引之處。」
東網體育FB同你追實體壇每個精彩時刻！
Follow東網體育IG一齊撐本地運動員！