【阿King】最佳交易！迪比利抵玩過尼馬
20180921
東網電視
更多新聞短片
(Getty Images)
巴塞隆拿上季賣走尼馬畀巴黎聖日耳門，以過億歐元簽入多蒙特小將奧士文尼迪比利，用來代替呢位巴西巨星，一度成笑柄。
加上奧士文尼迪比利上季因為傷病問題，各項賽事僅上陣23次入4球，全世界睇死佢又會淪為水貨，冇得同尼馬相提並論。
不過，風水輪流轉，尼馬喺世界盃過份誇張碌地，成為球迷公敵，今季喺PSG表現亦唔見突出，上場歐聯對利物浦，只能睇住球隊輸波，發揮唔出核心作用。
相反，奧士文尼迪比利愈戰愈勇，今季各項賽事上陣6場已入5球，已經多過上季總入球。而且往往係關鍵入球，包括西超盃射入反勝1球，擊敗西維爾，對華拉度列，轟入全場唯一入球，對皇家蘇斯達，又係射入反勝1球，分擔美斯救世主角色。
更何況奧士文尼迪比利只係21歲，比尼馬年輕5歲，而且佢加盟巴塞嘅轉會費為1.05億歐元，連尼馬轉投PSG嘅一半費用都唔夠，經過1年之後，證明巴塞呢次交易實在非常成功。
東網體育FB同你追實體壇每個精彩時刻！
Follow東網體育IG一齊撐本地運動員！