車仔失分兼折將 點同利物浦鬥呀
20180923
東網電視
更多新聞短片
(Getty Images)
周日(23日)英超頭場，季初順風順水嘅車路士，卻喺佢哋第600場倫敦打吡失威，作客「錘仔幫」韋斯咸只能打和0比0，聯賽5連勝亦告斷纜之餘，仲跌落第3位，被打窒道氣，嚟緊要兩鬥氣勢如虹嘅利物浦有啲危喎。
賽前聯賽5連勝嘅車路士，今場係佢哋出戰嘅第600場倫敦打吡，僅次於阿仙奴(674場)及熱刺(609場)，而有上周中歐霸休息嘅王牌夏薩特亦復出，相反韋斯咸射手阿拿奧杜域上場聯賽傷出，未能趕及披甲。
今場開波後車仔控制戰局，初段有夏薩特快射被救出。其後「錘仔幫」攻勢更加入肉，米查利安東尼奧先喺左路窄位射高，之後佢再近門狂抽太正，過唔到車仔門神阿列沙巴拿加嘅十指關，認真敗家。
易邊後韋斯咸食住個勢繼續施壓，耶莫蘭古喺禁區畀大衞雷斯輕微撞跌，球證冇吹12碼。其後車仔換入艾華路莫拉達加強攻力，呢位上周中歐霸對PAOK全場7次射門卻0中框嘅前鋒，近門快腳一挑，竟被韋斯咸門將法比安斯基用塊面撲出，咁都唔入堅黑仔，之後仲有中堅魯迪格傷出。
末段巴克里遠射直飛死角，又畀法比安斯基飛身救出，最終打和0比0，唔單止聯賽5連勝斷纜，畀6連勝嘅榜首利物浦甩開2分，更因得失球唔及同分嘅曼城跌落第3位，嚟緊喺聯賽盃及下周聯賽要硬撼利物浦，個勢冇晒明顯蝕底。
東網體育FB同你追實體壇每個精彩時刻！
Follow東網體育IG一齊撐本地運動員！