12M買到雲迪積克！阿仙奴當年為乜放棄？
20180924
東網電視
更多新聞短片
（互聯網）
利物浦中堅華基爾雲迪積克，自以天價轉投紅軍、成全球最高身價後衞之後，表現獲得一致好評，仲被多位名宿捧為當今球壇最強後衞，個個都話利物浦7500萬鎊畀得值。查實2015年雲迪積克以1300萬鎊轉投修咸頓前，阿仙奴有機會以1200萬鎊買入，但就係當年首席球探一句評語，搞到放棄交易。
時任些路迪副領隊尊哥連斯，近日上電視節目大爆料，話當年好多大球會都去觀察雲迪積克表現，當中包括阿仙奴同利物浦。當時些路迪有晒心理準備賣人：「當時雲格好有興趣買雲迪積克，不過阿仙奴首席球探Steve Rowley，就認為呢位荷蘭中堅態度有問題，周時表現漠不關心，所以兵工廠就冇出到手。而利物浦領隊羅渣士，就直接覺得雲迪積克未夠突出，同佢當時擁有嘅中堅（洛夫雲、馬馬度沙高、史卡迪爾）實力有距離，所以最後都冇出手，故雲迪積克就轉會修咸頓。」
東網體育FB同你追實體壇每個精彩時刻！