終非美斯鬥C朗 今晚莫迪歷開創新時代
20180924
東網電視
更多新聞短片
（互聯網）
萬眾矚目、新一屆世界足球先生，將於香港時間今晚深夜頒發，3大候選人C朗、莫迪歷同穆罕默德沙拿，將正面P.K.爭逐獎項。自07年起，每一屆都係美斯惡鬥C朗，今年終於開創咗新局面，其中魔笛同C朗贏面較高，而於C朗事先張揚缺席頒獎禮嘅情況下，莫迪歷極大可能開創新時代，贏出呢個每年最高榮譽個人獎項！
睇番形勢，C朗同莫迪歷機會可謂均等。C朗上屆以神射手姿態，帶領皇馬完成歐聯3連霸，而於上一季佢於各項賽事射入44球，當中最後10場西甲賽事射入18球。另外，佢於世界盃亦個人攻入4球，並成為國際賽史上士哥拿第2位。
莫迪歷方面，佢亦係皇馬歐聯三連冠功臣之一。而於世界盃佢更加一支獨秀，帶領克羅地亞殺入決賽，僅不敵法國奪得亞軍，而佢亦奪得世界盃金球獎，係唔少球迷以至球評家，舊年最佳球員嘅不二之選。而沙拿上屆轉投利物浦後大爆發，上陣52次攻入44球，勇奪英超神射手並成為雙料足球先生，亦帶領利物浦殺入歐聯決賽。
如果你係C朗擁躉，當然希望佢第6度封王；但若你係中立球迷，必然想莫迪歷打破C朗及美斯壟斷，擸走呢項個人最高榮譽。結果係點，今晚深夜自有分曉。
東網體育FB同你追實體壇每個精彩時刻！