【打破壟斷】十年大運完？C朗美斯點算？

嘩嘩嘩，國際球壇變天！？FIFA年度頒獎禮今晨喺倫敦舉行，不過令人意外係，過去十年包攬世足先生嘅當世兩大球王C朗同美斯，今次竟然雙雙不敵克羅地亞球星莫迪歷失獎，因而齊齊缺席「No Show」。查實要話33歲嘅「魔笛」今次登上皇座係改朝換代，實在有多少誇張，不過雙雄失意卻可能象徵住佢哋壟斷球壇嘅局面已經被打破。尼馬、基利安麥巴比、穆罕默德沙拿，甚至保羅普巴等都伺機等上位，國際球壇勢必會再起風雲！

阿根廷球王美斯喺2007年首度躋身世足先生最後三強，之後連續11年佔據住三甲位置，當中5次稱王。至於佢死敵C朗拿度則係喺2007年開始至今嘅12年間，僅於2010年無緣三甲，同樣亦5次成為世界最佳。簡單講，過去十年嘅國際球壇都係佢兩個玩晒！不過家陣美斯都已經31歲，C朗仲要33歲添，仲有冇得翻身，真係冇人知囉！

喺知道自己無緣今屆世足先生最後三強後，美斯一早話明因個人理由，唔會出席今晨頒獎禮。至於C朗雖然有份三甲，但由於收晒風得獎人唔係自己，佢最終都選擇留喺屋企唔去頒獎禮，結果兩大球王「No Show」，就令國際足協超尷尬。事實上，二人今次都有份入選年度最佳11人，但現場合照就只得9名得獎者，甚至要勞動頒獎嘉賓「細哨」朗拿甸奴代領獎同影相，據聞現場氣氛都好古怪兼且星光暗淡。

另一方面，對於美斯同C朗今次未有出席頒獎禮，有FIFA官員就鬧爆佢哋，話佢哋損害足球名聲。鬧得更勁仲有意大利名帥卡比路，批評佢兩個輸唔起：「佢兩個唔嚟，根本係缺乏尊重。C朗同美斯過去經常得獎，所以佢哋都唔鍾意輸，不過當你真係爭輸咗，你都應該展現應有姿態，就好似佢哋過去攞獎一樣。」最怕佢哋今次唔嚟，唔知以後仲有冇機會上台攞獎呢？

東網體育同你追實體壇每個精彩時刻！　

https://goo.gl/ewVpvE