【東體爭議】豬肉獎？沙拿贏金球冇人服
20180925
東網電視
更多新聞短片
今屆世界足球先生頒獎典禮，「埃及王子」穆罕默德沙拿雖然入選最後3強，不過最終只係排第3，最慘係連國際足協最佳11人都冇份入圍！不過，呢位利物浦巨星並唔係空手而回，佢爆冷拎咗全年金球獎(普斯卡斯獎)，呢個結果令大批網民嬲爆，事關大部份球迷都認為，C朗拿度同加里夫巴利喺歐聯入嘅超級倒掛，無論精彩程度同重要性，都遠勝穆罕默德沙拿嘅入波。
延伸閱讀：【有片●年度金球獎揭序幕 沙拿靚波百看不厭】
結果公布後，唔少球圈中人都非常反感，前熱刺中場賴恩美臣話：「經過今晚之後，呢個普斯卡斯獎嘅公信力已經蕩然無存。沙拿呢個入波，連上季英超最佳入球都唔係！加里夫巴利嘅倒掛係歐聯史上最佳入波之一，有乜可能被無視？」
就連沙拿嘅利物浦隊友占士米拿都出嚟抽水，話沙拿得獎入波只係佢上季「第7靚」入球，占士米拿喺twitter留言：「恭喜沙拿，你用上季個人第7靚嘅入波贏得最佳金球。」
延伸閱讀：【有片●超尷尬！沙拿當面拒絕加利仔訪問】
唔少網民質疑呢個係「豬肉獎」，陰謀論話FIFA唔想沙拿食白果喎！不過根據評選準則，普斯卡斯獎係由全球網民投票，而沙拿呢球就喺超過50萬投票之中得到38%選票。既然係一人一票選出，C朗同巴利似乎都無話可說，怪就怪皇馬Fans唔夠利物浦多囉！
東網體育FB同你追實體壇每個精彩時刻！