林伯作客搞死寸王　英冠仔英聯盃淘汰曼聯

曼聯衰開有條路，林柏特搞死恩師莫連奴，帶領英冠仔打比郡於奧脫福淘汰紅魔鬼，爆出驚天大冷門！紅魔鬼於英聯盃第三圈對打比郡，雖然收起數名主力，不過陣容亦算完整，仲有桑馬達極速開紀錄。以為係主隊屠殺開始，點知戰情峰迴路轉，利物浦借將哈利威爾遜同前紅軍門將卡臣，一個建功一個撲出12碼，成為晉級最大功臣，莫連奴於主場輸畀英冠仔，堅面目無光。

今仗領隊莫連奴收起普巴、勞基梳爾、域陀連迪路夫、路爾斯華倫西亞同迪基亞，但依然有盧卡古、安東尼馬迪爾、連格、尼曼查馬迪、艾舒利楊格等擔大旗，艾歷拜利同桑馬達亦得到正選機會。開波3分鐘曼聯就有個好開始，盧卡古於禁區後腳靚交，連格亦第一時間妙傳，桑馬達於禁區內起左腳射遠柱入網，紅魔鬼火速打開紀錄。9分鐘桑馬達幾乎入多粒，接應長傳突入禁區、一控一射靚到爆，但被門將卡臣用腳封位救出。曼聯本身踢得好順，但盧卡古兩次糟蹋入波黃金機會，13分鐘佢把握對手中堅甩轗單刀，但被力壓下射門竟然龍都唔中，24分鐘馬迪爾左路出靚波，盧卡古面對空龍又頂高，半場紅魔鬼僅領先1:0。

曼聯換邊後睇定嚟踢，但你唔肉緊去攻，幾時都有機會失波。於利物浦完全搵唔到機會、今季被借到打比郡嘅翼鋒哈利威爾遜，60分鐘射個落葉式罰球靚波為打比追平，跟手呢名威爾斯國腳，仲於67分鐘突破越位陷阱單刀一挑，主隊門將羅美路禁區外用手拍波，球證即刻拔紅趕佢出場。

曼聯打少一個依然有入波機會，但73分鐘盧卡古禁區內左腳抽近柱中柱。打比郡於85分鐘反先，積克馬利諾近門一頂破網，領先2:1。曼聯於補時階段扳平，後備入替嘅費蘭尼近門一鑿得手，法定時間2:2完場，直接射12碼分勝負。打比雖然係英冠仔，但處理極刑勁有信心，頭5輪同曼聯一樣入晒；進入突然死亡階段，菲爾鍾斯射第8輪被前紅軍門將卡臣救到，打比郡12碼贏8:7，總比數贏10:9，爆大冷淘汰曼聯，紅魔鬼於第三圈就畀英冠仔淘汰，堅醜死鬼！

東網體育FB同你追實體壇每個精彩時刻！

http://bit.ly/2ecTF2A