百鬧成才　史達寧數據勁到冇朋友

踢中前場球員，臨門一腳把握力一直係評價佢哋實力嘅最佳指標，喺呢一方面，效力曼城嘅翼鋒史達寧近年就經常成為球迷批判對象，插佢唔識入波。不過，尋晚曼城能夠輕勝白禮頓，又係靠佢一傳一射去贏波，只要你細心睇吓數據，你會發現史達寧真正實力，已經進化成頂級前鋒，真係勁到冇朋友呀！

曼城尋晚領先一球，就係靠阿古路傳中畀史達寧近門射入，而根據近日OPTA公布嘅一組數據顯示，呢位英格蘭球星原來係上季英超射門轉化入球成功率最高球員，多達54%，合共28次射門，就取得15個入球，係有真材實料呀！

事實上，連埋今季喺英超入咗4球，史達寧喺近16場英超賽事入面，就參與咗16個入球，包括交出8入球8助攻。此外，如果由上季英超開始計起，史達寧至今就參與咗34個「士哥」，包括攻入22球同12次助攻，喺同期就只有穆罕默德沙拿(46球)同哈利卡尼(38球)勁得過佢，即係全英超第3，問你服未！

東網體育同你追實體壇每個精彩時刻！　

https://goo.gl/ewVpvE