【有片】隔住Mon都覺得醜 薛拿雙重派膠
20180930
東網電視
更多新聞短片
(Getty Images)
周六(29日)晚德甲，史特加主場對雲達不來梅，又出現門將派膠，當時踢到68分鐘，史特加後衞波拿蘇沙掟界外球畀門將薛拿，點知薛拿發緊白日夢，反應太慢，臨急想用腳去控波時，又控唔穩，佢翻身追又追唔切，皮球就咁碌入龍門，「膠級」指數爆燈。
其實薛拿最錯唔係發白日夢，亦唔係追唔到個波，而係衰多腳掂到個波。因為根據球例，無論邊一方掟界外球，只要掟出之後，途中冇人掂到個波，直接碌入網，入波就係冇效。薛拿今次偏偏出腳掂到個波，入波自然有效，仲變成佢擺烏龍，可以話係雙重派膠。
29歲嘅薛拿有份協助德國捧2014年世界盃冠軍，竟然都犯呢種超低級錯誤，實在令人跌眼鏡。好彩史特加之後有卡斯特羅入番1球，以2:1擊敗雲達不來梅，真係差啲畀薛拿累死。
東網體育FB同你追實體壇每個精彩時刻！
Follow東網體育IG一齊撐本地運動員！