港超聯　迪亞高入兩粒！冠忠南區三連勝！

「中銀人壽香港超級聯賽」周日（30日）下午假元朗大球場上演「地區打吡」，客軍冠忠南區憑着後備上陣的迪亞高個人梅開二度，以2比1擊敗佳聯元朗，開季取得三連勝後，以9分暫居聯賽榜首。

今仗有狄卡奧及劉家銘倒戈相向的冠忠南區，後者於開賽2分鐘上前助攻接應高美斯長傳跳頂高出。主隊隨後開始採取主動，8分鐘先有基爾頓禁區外抽射高出，這位巴西中場隨後於15分鐘接應法比奧橫傳，在禁區外突施冷箭，同樣僅告高出。南區戰至27分鐘作出換人調動，塞爾維亞前鋒高美斯因早前被法比奧攔截時踢傷而退下火線，及時被送往醫院接受治療，並由迪亞高入替。33分鐘，元朗於禁區頂搏得罰球，惟葉子俊主射省中人牆。南區戰至43分鐘先開紀錄，狄卡奧右路開出罰球被杜馬思頭槌解圍不遠，隨後劉學銘意圖倒掛不果，後備上陣的迪亞高接應劉家銘傳送後近門建功，而客隊亦保住一球領先優勢入更衣室。

元朗在換邊後僅需5分鐘便將比數追和，基爾頓右路開出罰球，杜馬思把握史必頭槌解圍不遠近門跳頂破網。主隊隨後於54分鐘有上前助攻的羅振庭跟基爾頓撞牆後入禁區抽射，被謝德謙飛身救出。南區戰至65分鐘再度領先，迪亞高於禁區外橫傳予夏志明抽射中楣彈出，迪亞高及時補射中網射成2比1，隨後劉家銘於77分鐘接應夏志明右路開出角球，惟其頭槌攻門僅告高出。南區於完場前不乏入球機會，惟夏志明在88及89分鐘先後兩次突破，分別被陳嘉豪出迎及黎格爾及時攔截瓦解，但仍無礙冠忠南區以2比1擊敗佳聯元朗，開季取得3連勝佳績。

贏波功臣迪亞高於賽後表示，自己並沒有預料要在上半場後備上陣，但在場上便盡力做到最好，他亦指球隊表現出色，並認為今仗贏波全取3分非常重要，但對於球隊3戰全勝登上榜首，他強調球隊只會按步就班，逐場比賽集中去應付，下周好好專注應付對和富大埔關鍵一戰。

冠忠南區主教練鄭兆聰則指，兩隊各於上下半場踢出好波，亦滿意球隊能夠全取3分，同時亦提醒球員不可鬆懈︰「一個聯賽有10個月，有個好嘅開局只係加強信心，如果開局唔好都有時間扭轉形勢，冇乜嘢大不了，不過都想球員享受吓依家呢個時刻，希望個走勢可以延續落去。」對於高美斯的傷勢，「Ricky Sir」亦坦言從肉眼觀察已感到擔心。

佳聯元朗主教練郭嘉諾則認為，雙方今仗形成均勢，惟埋門能力成為勝負關鍵︰「兩邊機會相等，我覺得場波『五五波』，我覺得球隊表現唔差，尤其是喺1比1嘅時候，我哋嘅埋門機會比較多，如果把握到的話，場波可能有唔同發展，始終球隊喺落後時後備選擇唔多。迪亞高今場表現令我哋感到意外，球隊防守策略冇預到佢咁早出嚟，頓時未能做出應對。」

「郭Sir」亦指，希望隊中小將能夠克服面對強隊的心理障礙︰「我選擇執教呢隊嘅原因之一，就係可以喺主場對強隊，等一班年青球員唔好驚強隊，下場波對傑志亦都準備好。今場輸咗場波，但係球隊踢得好，亦都有入波，我哋輸得起，只要唔好輸個團隊精神的話，我相信我哋可以好快重整到。」