曼聯要換帥 先問問C朗意見啦
20180930
東網電視
更多新聞短片
曼聯陷入危機，傳奇名帥費格遜都話覺得擔心，並盛傳現任領隊莫連奴好快會被炒，由施丹接手領軍。無獨有偶，球王C朗曾經喺呢3位名帥麾下比賽過，到底佢點睇呢3人呢？或者對曼聯管理層換帥會有啟發。
C朗接受英國傳媒訪問時，先講到費格遜：「當年我由士砵亭加盟曼聯，足球事業剛開始，好多嘢都唔識，費格遜教我好多事情點去處理，佢就好似我爸爸一樣，對我成長非常重要，特別係英超非常難踢，幸好有佢指導，所以我加盟曼聯時係1位男孩，轉投皇馬時，已經成為1位男人。」
至於同樣係葡萄牙人莫連奴執教皇馬時，傳出C朗同佢不和，因為「寸王」戰術同呢位射手格格不入。不過，C朗並唔係咁諗：「唔可以咁講，我必須適應莫連奴嘅戰術，呢個係球隊整體策略。」
不過，講到「寸王」最後敗走皇馬，C朗就冇乜感覺，話一切以球隊為重，似乎同莫連奴嘅感情真係麻麻，但C朗仍然留有餘地，話唔介意再同莫帥合作喎。
最後講到施丹，C朗就大讚呢位法國球王非常犀利，將皇馬由低潮帶上巔峰，特別係2016年皇馬贏歐聯冠軍，自己亦為葡萄牙捧歐國盃，係自己職業生涯最佳嘅球季，可以喺施丹率領嘅球隊比賽，感到非常驕傲。
C朗仲提到1位合適嘅教練，往往可以感染全隊球員，令球隊重生。照咁講，曼聯依家同當年皇馬相似，都係處於低潮，莫非施丹就係領帶紅魔鬼重生嘅「合適主帥人選」？
東網體育FB同你追實體壇每個精彩時刻！
Follow東網體育IG一齊撐本地運動員！