赫特翻生卡城冇運行 般尼英超兩連勝
20181001
東網電視
更多新聞短片
（Getty Images）
英超周日獨腳戲，升班球隊卡迪夫城主場出擊，雖然踢得肉緊，但又中柱又被救空門，最終錄得19次埋門下，依然要輸1:2。般尼今戰血肉長城守住大門，門將赫特有好表現，全場3射門2次中龍入波，英超2連勝開始轉運。
卡城賽前4連敗，聯賽亦3連敗，被阿仙奴、車路士、曼城大炒，今戰對住般尼踢得好肉緊，其中祖殊梅菲好活躍，曾經窄角度射中柱，之後蘇賀利近門快射睇怕入硬，點知又畀赫特落地勁快用手叉走。之後卡林柏達臣近門一頂又被對手護空門種下敗因。
換邊後貝治古蒙臣門前頂入為般尼打開紀錄，卡城跟手憑一次地波組織傳靚波入禁區，祖殊梅菲及時趕到撞射入網追平。但般尼攻門效率奇高，貝治古蒙臣左路出波，禾基斯頭槌鑿入又試領先。卡城之後連番攻門，但始終過唔到般尼防守血肉長城，最終般尼繼上輪擊敗哈特斯菲爾德後取得聯賽2連勝，卡城連盃賽5連敗，英超仲係未開齋。
東網體育FB同你追實體壇每個精彩時刻！