再鬥英軍被睇低 莫迪歷呢勻幾頭痕
20181012
東網電視
更多新聞短片
歐洲國家聯賽A4組大戰，周六凌晨有克羅地亞主場同英格蘭重演2018世盃4強戲碼。「格仔軍團」自世盃爆冷拼死闖入決賽之後，近期表現明顯下滑，加上呢場要閉門作賽，主場優勢唔算明顯，面對有多位弗爆新星壓陣嘅「三獅軍團」未必有力搶分，平手盤捧返英格蘭好過。(奇妙電視 77台、有線602及662台周六凌晨2時45分直播)
克羅地亞呢仗雖然喺坐鎮主場，不過就唔畀球迷入場助威，皆因球隊喺2016歐國盃外圍賽面對意大利期間，主場草皮上出現具爭議性嘅納粹標誌，結果畀歐洲足協捉到正，雖然克羅地亞足協已經作出道歉兼譴責事件，不過處分肯定走唔甩，呢場唯有閉門作賽。
其實「格仔軍團」啱啱喺今個夏天嘅世盃有超水準發揮，歷史性首次打入決賽，雖然最終不敵冠軍法國，飲恨而回，不過成功達至自我突破，演出真係令球迷留下深刻印象。唔知係唔係為喺世盃創佳績搏得太盡，克羅地亞喺世盃過後狀態明顯陷入低潮，繼友誼賽遭葡萄牙逼和之後，上仗歐國聯仲畀西班牙以0比6羞辱，表現和世盃期間明顯判若兩隊。尤其球隊一直對莫迪歷和拿傑迪錫等老將過於依賴，人才斷層情況嚴重，加上波索域同維沙積高兩位效力國際米蘭嘅球隊主力因傷缺陣，克羅地亞呢場戰鬥力難有保證。
相反英格蘭軍團今次招入唔少年輕球員，其中就包括今排弗到漏油嘅新星查頓辛祖，呢位曼城青年軍出身嘅18歲攻擊手，自從加盟德甲勁旅多蒙特之後，表現令人眼前一亮，可以話係令一班三獅球迷又可以對國家隊未來有所憧憬。有佢搭住近期腳風順返嘅英軍頭號射手哈利卡尼，英格蘭前場火力有保證，為報世盃4強被淘汰嘅一戰之仇，呢場一班三獅球員肯定會出多幾成力，睇好佢哋作客搶得好局，英格蘭平手盤捧得過。
陣容
克羅地亞 4231
門將：路維卡連歷
後衞：馬高洛治、馬迪積米祖域、杜馬高維達、安東尼奧米歷
中場：巴迪積、拿傑迪錫
攻中：卡拉馬歷、莫迪歷、比列錫
前鋒：艾雲辛天尼
英格蘭 3142
門將：比克福特
後衞：基爾獲加、史東斯、哈利馬古尼
中場：艾歷迪亞
攻中：捷比亞、哈利雲克斯、巴克里、丹尼路斯
前鋒：查頓辛祖、哈利卡尼
東網體育FB同你追實體壇每個精彩時刻！
Follow東網體育IG一齊撐本地運動員！