沙拿超勁直入角球!黑氣未過傷出

2018年10月13日 05:28
東網電視
更多新聞短片
(互聯網)

穆罕默德沙拿黑氣未過,以為入完金球會順番?點知捱唔晒完場就受傷!非洲國家盃外圍賽事,埃及4:1大勝斯威士蘭,沙拿於完半場前處理右路角球,佢出黃金左腳直接抽入網窩堅到震。本季沙拿頭頭碰着黑,踢到88分鐘拉傷腿筋需被換出,暫時未知要傷幾耐,利物浦認真頭痕。

上季踢到曉飛、攻入38個聯賽入球嘅沙拿,本季狀態大跌,迄今僅入3球。今戰佢為埃及正選出戰非國盃外圍賽,直入角球精彩絕倫,佢入波後冇太大慶祝,僅微笑向球迷致意。而呢個入球係佢第13個非國盃入波,打破國家紀錄;亦係第40個國家隊士哥。但唔順就係唔順,完場前沙拿受傷一度坐於地上無法郁動,之後捱到補時階段頂唔順要被換走。據埃及隊醫表示,沙拿係肌肉受傷,傷情唔算太嚴重,不過要傷幾耐要等詳細檢驗後先至知道。

利物浦近期戰績回落,已經四戰不勝,冇埋沙拿更加惡搞。嚟緊紅軍於英超會作客哈特斯菲爾德,之後於歐聯主場對貝爾格萊德紅星。