狙擊寸王黑手曝光 星洲富商驚天陰謀！
20181013
東網電視
更多新聞短片
曼聯領隊莫連奴近期不斷有負面消息傳出，一度盛傳將會被炒魷，上場聯賽「紅魔鬼」3比2反勝紐卡素後，莫連奴曾提出有人向佢發動「狙擊」。原來莫連奴所講嘅「狙擊手」，竟然係新加坡富商林榮福，而且「寸王」懷疑佢咁做嘅原因，係因為呢位富商準備收購曼聯！
爆出呢單猛料嘅人，係莫連奴死黨兼「左右手」柏拉梅斯，呢位69歲老人家向葡萄牙《紀錄報》爆料話：「呢個新加坡富豪(林榮福)負責管理同支持呢個狙擊莫連奴計劃，佢想搞死莫連奴之後就提出收購曼聯。」報道指林榮福同莫連奴都同金牌經理人佐治文迪斯有密切關係，不過2人就曾經鬧不和，所以如果莫連奴做曼聯領隊，林榮福收購會有障礙。
英國《太陽報》亦指出，林榮福之前協助史高斯、尼維利兄弟等曼聯名將收購沙福特城，而且擁有呢間球會50%股份，而且又一齊開酒吧同足球餐廳，合作非常緊密，「咁啱」史高斯等人就係呢期插莫連奴插得最甘嗰班人，難怪莫連奴會覺得佢哋係有計劃咁去狙擊自己啦！
林榮福依家係西甲勁旅華倫西亞個班主，身家估計有20億英鎊，佢喺2010年曾經開價3.2億英鎊收購利物浦，雖然最終未有成事，但佢想做英超班主嘅野心似乎仲未熄滅喎。
東網體育FB同你追實體壇每個精彩時刻！