【人物誌】成功掛嘴邊！迪比翻生唔係得把口
20181014
東網電視
更多新聞短片
荷蘭足球人才輩出，由告魯夫、荷蘭三劍俠、柏金、史奈達、古華特到洛賓，個個都係公認天才球員，不過荷蘭國家隊近幾年沉淪谷底，直到近期先有復甦跡象，而呢朵「鬱金香」嘅復興希望，肯定擺喺陣中最有巨星風範嘅迪比身上。
依家只係得24歲嘅迪比，代表荷蘭國家隊上陣已經41次，少年得志嘅佢喺燕豪芬成名後，21歲就轉投英超班霸曼聯，仲着埋「紅魔鬼」傳奇7號，當各界以為佢會變新C朗，點知出現反高潮，僅效力1季半，喺英超入得2球，就被賣去法甲里昂。不過，冇咗曼聯7號波衫沉重壓力，反而令迪比鹹魚翻生，佢喺上季法甲狂入19球，踢國家隊亦如魚得水，盡顯巨星風采。
年紀輕輕嘅迪比同好多年輕球星一樣，球場外極力追求時尚、名車同靚女，女友更係美國索女明星Lori Harvey，雖然平時愛出風頭嘅性格令唔少球迷覺得佢「幼稚」，但迪比對足球嘅夢想卻係無庸置疑。全身「公仔」嘅迪比，原來喺嘴唇入面亦有收紋身，入面紋住succesvol，即係「成功」咁解，而佢亦用行動證明，「成功」唔單止掛喺嘴邊，仲可以用雙腳嚟到實踐！
東網體育FB同你追實體壇每個精彩時刻！