英球手嫌污糟拒握手 羅弘昊：侮辱中國人
英格蘭桌球公開賽64強，奧蘇里雲及傅家俊都成功過關，但鋒頭就畀中國小將羅弘昊搶晒。呢位18歲中國球手以局數4:3反勝英國杜菲，賽後主動向杜菲伸手，後者卻視而不見，僅同裁判握手。杜菲之後於Twitter解釋，話唔握手嘅原因係羅弘昊如廁後冇洗手。羅弘昊得悉後嬲到爆，於微博上大反擊，話外國球手根本冇尊重過中國球手，並表示一定向世界桌球總會投訴。
本賽季先打職業嘅羅弘昊，於7局4勝制賽事曾一度落後0:3，但佢之後越戰越勇，反勝對手4:3晉級。於最後一局打到藍波時，羅弘昊Dup中袋但最後符碌跌落尾袋超分奠勝，羅弘昊興奮慶祝，並主動走向杜菲伸手。
但杜菲就先用球桿打向檯上白波，並繞過羅弘昊與裁判握手。羅弘昊當時仲未知道咩事，之後向杜菲再度伸手，後者一樣當睇唔到。事後杜菲於網上講出原因：羅弘昊去完廁所唔洗手。
羅弘昊對此非常不忿，佢於微博話：「非常開心今天上演了一場大逆轉，還有就是今天對手比賽結束的時候沒有跟我握手！我認為這是極其不尊重對手！輸不起麼？後來我去跟這邊的人說，然後這邊人跟亞當（杜菲）打電話，亞當理由是我決勝局去洗手間沒有洗手，他覺得髒，而且我洗沒洗手他看見了？要按這種說法那我今天球打得不好生氣就應該把球打出去麼？這也算理由麼？我今天告訴你們為啥我不摘下手套握手因為這幫老外壓根就沒尊重過中國球員！憑什麼讓我們中國人去尊重他們？！反正這事總該有個說法吧！」羅弘昊並於微博＠了世界桌球總會官方微博帳號。
之後羅弘昊仲話：「放在平時這事也就算了，但這可是比賽而且直播！這是代表中國人的尊嚴！這要是世台聯（世界桌球總會）都不處罰的話，那下次我也不握手大家都不握手算了，看不起中國人是麼？！」
唔少國內網民都大鬧杜菲輸唔起，有聲音仲表示「我國目前是央央大國，國力如日中天，再加上斯諾克（桌球）領域上，我國已成為不可缺失的重中之重，如果如羅所言論，一旦升級惡化，對斯諾克（桌球）這項運動推廣會是一場災難。」亦有國內網民到杜菲嘅社交網踩場，大鬧杜菲冇紳士風度。
Follow東網體育IG一齊撐本地運動員！
東網體育FB同你追實體壇每個精彩時刻！