【人物誌】日本10號中島翔哉　3.6億版大空翼

日本球壇又誕生一個童話式億元身價球星！今年至榮升大國腳嘅10號仔中島翔哉，畀西甲榜首球隊西維爾睇中，希望由葡超樸迪莫倫斯手上收歸己有，據講轉會金額達4,000萬歐元（約3.6億港元）。

中島翔哉喺近兩個月日本國家隊嘅A級賽事，經常正選披甲，搞到柴崎岳都公開話感受到新生代嘅壓力，前國腳鋒將、現任球評家金田喜稔更形容中島翔哉、南野拓實同堂安律係「新世代三劍客」，同上世紀八十年代「日產黄金時代」嘅佢、木村和司同水沼貴史3個有得比，難怪有人形容佢係「現實版大空翼」。

6歲開始踢波，嚟自一個單親家庭嘅中島翔哉，1994年8月23日出生於東京都八王子市，佢嘅足球生涯亦喺家鄉展開，先後效力東京綠茵、FC東京等，期間曾外借富山勝利。2016年佢帶領日本U23捧走亞青盃，並且當選MVP大露鋒芒，2017年9月轉投葡超樸迪莫倫斯。

身高只得1米64，體重62公斤嘅中島翔哉，腳法細膩，傳送功夫好，跑動勤且速度快，去季為樸迪莫倫斯上陣31場入10球，貢獻12次助攻，畀當地記者封做外號「小皇帝」。由於表現出眾，西維爾、愛斯賓奴經常派球探觀察佢，擺明有心挖角，今年1月馬上將違約金由1000萬歐元上調1倍，部分傳媒仲爆話唔只咁少，起碼係2000萬至4000萬歐元添。　

自從中島出世，佢媽咪就患上接觸障害症，頻繁出入醫院，結果父母就喺佢6歲時離異，於是中島由媽媽一手帶大，中島媽當時孭住大筆債，又碰到過公司破產，生活好艱難。正因為咁，中島翔哉非常感激媽咪，立下志願要買間大屋畀佢享福，2012年18歲嗰陣，中島同東京綠茵簽咗職業合約之後努力儲蓄，兩年後過檔FC東京，佢已經有成2300萬日圓年薪（約160萬港元），2016年終於喺東京購買咗一間獨立屋，送畀媽媽做禮物。

因為練得勤過其他人，畀日本媒體形容為「練習之蟲」嘅中島，一直以進軍西班牙、德國聯賽做目標，今次佢有機會實現童年夢想嘞。

東網體育FB同你追實體壇每個精彩時刻！

http://bit.ly/2ecTF2A