單場五粒！廿歲德甲仔轟伊巴式金球

盧卡祖域雜技式金球：https://bit.ly/2NPoyIX　

法蘭克福今晨(周六)德甲主場7比1狂炒杜塞爾多夫，男主角必定係個人獨取5球嘅前鋒盧卡祖域，呢位20歲塞爾維亞國腳，亦成為德甲史上最年輕「單場入5球」球員，佢今場5個入波各有花款，左腳、右腳、頭槌以及「雜技式」高難度窩利都有得賣非常全能，仲勁破法蘭克福以至德甲紀錄。賽後佢即刻多謝前教練、現拜仁主帥尼高高華，教佢球技之餘仲教曉佢做人，唔通咁快就想向拜仁搲撈？

盧卡祖域依家其實仲係葡超勁旅賓菲加球員，上年獲法蘭克福借用2年，德甲首季上陣22場入8球，而且當中只得9場係做正選，入球效力驚人，今季佢更上一層樓，踢6場聯賽勁入7球。法蘭克福喺借用期滿後有權用1,250萬歐元轉會費將盧卡祖域「買斷」，經過今場之後，相信法蘭克福都唔會有任何疑慮啦。今仗一戰成名，盧卡祖域成法蘭克福隊史上第一位單場進5球嘅球員，更以年僅20歲又300天之齡，成德甲歷史上最年輕單場入5球球員。賽後佢多謝尼高高華：「佢令我知道點成為一個好球員同埋一個好人，我喺佢指導之下快速成長，真係好多謝佢。」

盧卡祖域少年得志，佢16歲已經為塞爾維亞班霸貝爾格萊德紅星入波，至今仍然係紅星史上最年輕入球球員，佢偶像係傳奇前鋒彭錫夫同哥倫比亞射手法卡奧，所以踢法都有2位猛將嘅影子。今場對杜塞爾多夫入嘅第1個入波最精彩，佢接應隊友左路傳中，喺幾乎背對龍門情況下，騰空拗腰用左腳窩利抽入，認真犀利。

東網體育FB同你追實體壇每個精彩時刻！

http://bit.ly/2ecTF2A