【特稿】曼聯逆轉勝 要多謝莫耶斯
20181108
東網電視
更多新聞短片
(互聯網)
曼聯喺周四(8日)凌晨歐聯，反勝祖雲達斯2:1，兩位79分鐘後備上陣嘅球員成為贏波功臣，先係桑馬達86分鐘射入罰球扳平。
3分鐘之後，紅魔鬼再利用罰球戰術，費蘭尼憑高大身驅，牽制祖記4位球員，頭槌批向後柱，搞到對手邦路斯擺烏龍。
兩位功臣雖然並非莫連奴愛將，但卻多次拯救「寸王」，曼聯上月英超主場落後紐卡素0:2，同樣係後備上陣嘅桑馬達又射入罰球，揭開反勝序幕。曼聯自從贏完呢場波後，成績開始反彈。
無論係效力車路士時期，或現時踢曼聯，莫連奴同桑馬達關係都若即若離，主因係「寸王」唔滿意呢位中場欠缺防守力，但桑馬達創造力及射術都係一流，落後需要救亡時，往往成為佢表演時間。
至於費蘭尼更加係比賽末段，需要狂轟爛炸「博大霧」嘅佳選，憑強大制空力，撞散對手防線，今次又湊效，好彩莫連奴冇賣走佢咋。
值得一提，桑馬達同費蘭尼都係「費Sir接班人」莫耶斯簽入，呢位「天才」雖然敗走紅魔鬼，但卻留下珍貴遺產，曼聯有今場嘅反勝，應該向莫耶斯講聲多謝
東網體育FB同你追實體壇每個精彩時刻！
Follow東網體育IG一齊撐本地運動員！