正呀喂！傳曼聯明夏訪港 本周有公布
20181120
東網電視
更多新聞短片
曼聯Fans尖叫吧！據《ESPN》報道，曼聯明年夏天嘅季前熱身賽已經安排得七七八八，除咗會喺澳洲站踢2場比賽之外，盛傳仲會訪問亞洲，當中包括日本同香港2站，預計今個星期之內會有正式公布。如果消息屬實，曼聯會繼2013年後再次訪港，肯定會掀起全城熱潮！
澳洲傳媒指曼聯明年7月份，會去柏斯踢2場賽事，其中一場係對另一支英格蘭球隊，傳聞對手會係列斯聯，另1場就會對澳職球隊珀斯光輝。《ESPN》消息更指出，曼聯嘅季前熱身之旅仲會包括亞洲站，目的地好可能係日本同香港。「紅魔鬼」對上一次訪港係2013年，當年佢哋以5比2大勝傑志，入球者係韋碧克、基斯史摩寧、法比奧達施華、贊奴沙同連格。
不過，英國《每日星報》指曼聯領隊莫連奴將會對呢個旅程有所微言，事關「寸王」向來屬意去美國集訓，因為當地球場同設施良好，所以曼聯近5季有4季都會去美國進行季前集訓，不過行政總裁伍德沃德就想繼續開拓亞洲同澳洲市場，所以唔理莫連奴反對，搵錢至上。
東網體育FB同你追實體壇每個精彩時刻！
支持本地運動員，一齊去「睇體」！