香港隊　鍾偉強：好愕然！我會繼續努力

獲韋特徵召出戰東亞盃第二圈，並在對中華台北一仗後備上陣，射入奠勝一球的和富大埔鋒將鍾偉強，對於「白咖喱」辭職的消息，感到非常驚訝！「我都係啱啱收到消息，香港隊啱啱有啲成績，本來大家都好開心嘅，但佢突然辭職，相信唔止我好多球員都會好愕然。」

韋特上任後，鍾偉強不僅第一次獲徵召，更第一次上陣、第一次入波，更獲球迷冠予「韋特福將」之綽號，但如今韋特離去，會否擔心「新官上任」後，不會再獲機會？「都踢咗幾場國際賽，自己係有啲信心嘅，但我可以做嘅就係再努力啲，藉住喺球會表現，爭取新任香港隊教練嘅垂青。」

其他球圈中人回應：

曾錦濤（東方龍獅球員）：「可惜嘅，香港隊喺佢帶領下踢得好進取，同佢畀到球員好大自由度同信心，咁短時間踢到成績出嚟，無法啦，唯有祝福佢有更好發展。」

楊正光（富力R&F主教練）：「咁快走？個人睇法係日本球會唔會好倉卒去請教練，相信應該接洽咗一段時間，唔會突然間話請就請。當然，可能仲有其他原因，希望足總快啲請到繼任人啦！」

陳偉豪（前港隊隊長）：「港隊士氣咁好嘅情況下，發生咁嘅事，想信唔多唔少會帶嚟影響，一定要快啲請番個人先得，快手啲啦！」

陳曉明（理文主教練）：「其實都喺我意料之內，只不過無諗過咁快，因為我認識嘅佢，佢係一個喺工作上好進取嘅人嚟。至於今次咁辭職，我哋旁人好難話佢啱定錯，因為當初佢同足總簽約有無其他協議或者附帶條件呢，我哋唔會知，點都好，都多謝佢嘅，起碼佢真係帶領香港隊入到東亞盃決賽周。」

梁守志（東方龍獅總監）：「有啲人話佢嚟香港係騎牛搵馬，無道義之類，我就唔太認同，因為睇番之前喺台灣嘅東亞盃，中華台北啲球員點樣為佢（指韋特）搏，同啲球隊職員同佢點攬頭攬頸，我相信佢唔係咁嘅人，就算佢嚟咗一陣，香港隊啲球員都好支持佢。人望高處，佢咁選擇都無可厚非嘅，當然處理可以好啲。」

梁諾恆（富力R&F後衞）:「好意外，因為上星期仲同佢上聯絡過。希望港隊可以盡快搵到新教練，等一切可以如常運作。」