總結：時光可變！友共情不變
20181211
東網電視
更多新聞短片
勒邦占士(右)同韋迪非常老友。(美聯社圖片)
湖人喺NBA主場以108:105撲熄熱火，勒邦占士同韋迪最後1次交手，演繹友共情不變故事。完場前大帝看管閃電俠，令對方強行出手嘅扳平3分射失，賽後兩大球星深情擁抱，然後互換球衣，兄弟情盡在不言中。
開波前2個鐘頭，占士同韋迪約好喺健身房聚舊、合照同擁抱。到比賽開始，湖人主場播放致敬韋迪嘅短片，全場觀眾起立鼓掌，結果兩隊同時打出好波，比賽尾段占士仲進入掌管比賽模式，最後7分鐘得分加助攻為球隊貢獻17分。
全場最高潮位喺最後34秒出現，兩大球星對位，占士被干擾強行出手唔入，轉個頭大帝博到犯規兩罰全中，逼到熱火要博3分。完場前7秒，韋迪喺占士看管下夾硬起手，轉身射個3分波唔入，隊友搶到籃板後起手又唔中，注定熱火輸波。
最後占士搶到籃板扔上天，韋迪笑住捉住佢擁抱，假如湖人同熱火唔能夠同時入總決賽，佢哋再冇機會交手，所以佢哋交換球衣留念。占士全場取得28分、9個籃板同12次助攻，韋迪後備上陣有15分、5個籃板同10次助攻，互相以尊重對方嘅表現告別。
同日，勇士喺主場以116:108擊敗木狼，史堤芬居里取得38分、7個籃板同6次助攻，包括個人射入7個3分，加上積蒙格連傷愈復出有7分、10個籃板同7次助攻，協助勇士完成4連勝。相反，唐斯有31分、11個籃板同4次助攻，都阻唔到木狼2連敗。
最新賽果(左方主場)
溜馬 109:101 巫師
76人 116:102 活塞
塞爾特人 113:100 塘鵝
公牛 89:108 帝王
公鹿 108:102 騎士
雷霆 122:113 爵士
獨行俠 101:76 魔術
金塊 105:99 灰熊
太陽 119:123 快艇(加時)
勇士 116:108 木狼
湖人 108:105 熱火
支持本地運動員，一齊去「睇體」！
東網體育FB同你追實體壇每個精彩時刻！