總結:CP3又傷!火箭冇佢即刻冧檔

20181221
東網電視
更多新聞短片
占士夏登同基斯保羅(左圓圖)分別整親。(互聯網)
火箭喺NBA作客以99:101不敵熱火,雖然占士夏登繼續着火攻入35分,不過佢哋喺基斯保羅傷出下,最終冧檔斷送領先16分優勢,5連勝走勢宣布結束。
原本火箭喺第1節已撻着,利用瘋狂3分攻勢一度領先16分,點知基斯保羅喺第2節被偷波後,自己拉傷左腳腿筋返更衣室,就算占士夏登最後有35分、6個籃板同12次助攻,始終救唔番火箭,因為艾歷哥頓完場前射失絕殺3分。
美國傳媒預測,基斯保羅喺短期內難以復出。或者有球迷覺得,CP3嘅表現唔值4,000萬美元年薪,但無可否認,火箭冇佢好難靠占士夏登獨撐贏波,畢竟數據上,今季火箭喺佢因傷缺陣下,5戰全敗,加上今場被逆轉,證明佢好重要。
另外,占士夏登喺比賽中剷籃,意外被對手撞到左眼腫晒,可能會影響佢練習同比賽,好在佢保持樂觀,仲識得嗌球迷放心:「我自己覺得冇咩大問題,傷病點都會出現,我哋只能夠喺保羅休息嘅時候,打出更好表現,更努力去贏波。」
同日,快艇喺主場以125:121擊敗獨行俠。比賽充滿火藥味,出現過扯頭帶,同埋封阻變兜頭拍嘅場面,最後加連拿利爆發有32分、6個籃板同4次助攻,協助快艇終止4連敗。相反,當錫有32分、4個籃板同5次助攻,都阻唔到獨行俠連輸4場。
最新賽果(左方主場)
熱火 101:99 火箭
快艇 125:121 獨行俠
支持本地運動員,一齊去「睇體」!
東網體育FB同你追實體壇每個精彩時刻!