親證棄買沙拿 艾美利零眼光累阿仙奴
20181229
東網電視
更多新聞短片
（互聯網）
艾美利當日一個決定，或者會累阿仙奴付出代價！呢名西班牙教頭，本季捧雲格棒執教兵工廠，今輪英超將去到晏菲路，挑戰一哥利物浦。講起紅軍王牌穆罕默德沙拿，艾美利承認當日執教巴黎聖日耳門時，曾放棄收購呢名埃及射手，原因係認為沙拿冇足夠實力踢巨型班。若當日艾帥肯信沙拿，後者未必加盟紅軍，今輪兵工廠就唔使面對呢名狀態火熱嘅鋒將。
艾美利於16至18年帶領巴黎聖日耳門，而沙拿於15至17年喺羅馬踢到曉飛。當時PSG想為卡雲尼搵個鋒線拍檔，其中一個選擇就係沙拿：「當時PSG的確有考慮過收購沙拿。不過我對佢抱有懷疑，認為佢未必可以於巨型班踢出應有水準。佢剛過檔利物浦時，無論球評家抑或球迷，都有一樣嘅懷疑，但沙拿用表現證明自己卡士。去到今日，如果要揀世界五大足球員，沙拿會係其中一位。」
支持本地運動員，一齊去「睇體」！
東網體育FB同你追實體壇每個精彩時刻！