【不斷更新】曼城反底 砌低聖人
20181230
東網電視
更多新聞短片
（法新社）
曼城終於谷底重生，英超作客修咸頓贏3:1，終結近四聯賽輸三場嘅頹勢。防中費蘭甸奴復出，大衞施華對辦，都值得藍月亮球迷高興，但左閘位問題依然非常嚴重。戴爾夫停賽三場，烏克蘭小將辛真高填個左閘位，今場就派膠造就對手一度扳平；之後佢於禁區明顯犯規，但球證竟然毫無表示，曼城轉頭就憑一個烏龍波再度超前，一來一回重創修咸頓，亦直接令曼城翻生。藍月亮後防弱點全世界都睇到，下場對榜首利物浦勢被重點攻擊。
【23:59】
85分鐘，主隊賀積查治飛鏟費蘭甸奴用鞋底去，直紅出場
【23:53】
80分鐘，馬列斯走空晒右路狂抽，又畀門將撲出
【23:33】
59分鐘，阿古路接應快開罰球，轉身勁射中楣
【23:27】
55分鐘，大衞施華妙傳，史達寧單對單面對龍門勁射又救出
【23:04】【半場完】修咸頓 1:3 曼城
曼城近四聯賽輸三場，今戰有防中費蘭甸奴復出，對球隊中場攔截極有幫助，其中一球妙傳史達寧落底線傳中好有功架。但曼城傷咗班捷文文迪，左閘位問題仲未解決，辛真高於後防被偷拖皮球，就直接導致球隊被追平，之後佢於禁區內侵犯對手，球證冇畀12碼更非常關鍵。曼城冇輸極刑後，轉頭就憑個烏龍波再次領先，完半場前阿古路更整多粒，曼城連運都有埋，今場係時候反彈。
【23:00】修咸頓 1:2 曼城
聖人冇12碼之後即輸，禾特普斯回防擺烏龍，曼城再次領先
【22:59】
完半場前辛真高幾乎再犯錯，禁區內明顯侵犯主隊球員，但球證冇表示，曼城有運！
【22:56】
42分鐘，阿古路禁區內一射唔中龍
【22:51】修咸頓 1:1 曼城
修咸頓追平！曼城辛真高危險地帶被偷拖個波，賀積查治長驅直進勁射搞掂，1:1！
【22:47】
33分鐘，查理柯士甸接應角球近門一批，艾達臣神救！
【22:39】
26分鐘，史達寧右路底線靚傳，阿古路近門一射，畀對手門將神救
【22:33】
19分鐘曼城打反擊，馬列斯於中場推到禁區頂左腳一射僅出界
【22:24】修咸頓 0:1 曼城
10分鐘，大衞施華接應貝拿度施華靚傳，禁區輕易射入，曼城1:0！
【22:19】
史達寧禁區搶走對手腳下球，大衞施華近門一射被救出，曼城嚟料喇！
修咸頓 Vs 曼城
【22:15】比賽開始。
修咸頓正選陣容（4141）
門將：1阿歷士麥卡菲
後衞：66卡利藍斯、35碧拿歷克、5積克史堤芬斯、33馬特泰基特
防中：14奧里奧爾羅美奧
中場：11穆罕默艾爾尤諾斯、18勒美拿、23賀積查治、16禾特普斯
前鋒：10查理柯士甸
曼城正選陣容（433）
門將：31艾達臣摩拉斯
後衞：3丹尼路雷斯、4高柏尼、14拿樸迪、35辛真高
中場：20貝拿度施華、25費蘭甸奴、21大衞施華
前鋒：26馬列斯、10阿古路、7史達寧
【全場完】水晶宮 0:1 車路士
車路士領隊沙利今場唔用「無鋒陣」，搵基奧特打正前鋒，但效果麻麻，呢位法國國腳有2次入波都因越位在先，被判無效，浪費擴大紀錄機會，自己仲傷出，最終車路士維持小勝水晶宮1:0，睇來沙利下場都係用番「無鋒陣」比較好。
【21:31】水晶宮 0:1 車路士
基奧特勁射入網，但越位在先，慘食詐胡，仲受埋傷，由艾華路莫拉達入替。
【21:24】水晶宮 0:1 車路士
比賽處於拉鋸，車路士睇定來踢。
【21:07】水晶宮 0:1 車路士
簡迪勁過前鋒呀！佢靚入楔接應雷斯妙傳，心口一控第一時間射入，車仔1:0！
【20:47】【半場完】水晶宮 0:0 車路士
車仔上半場表現唔曳，就算作客都取得優勢，先有基奧特入波越位在先，之後有韋利安罰球同巴克里怪腳中柱，半場領先認真冇運。水晶宮打個穩守突擊亦都穩打穩紮，但若換邊後冇更進一步演出，睇嚟幾難守得住車仔。
【20:37】
巴克里接應角球怪腳射中柱，水晶宮唔失波有運
【20:35】
韋利安射靚罰球，中人牆後中柱，之後轉頭佢再遠射，又畀門將撲出，車仔慘呀！
【20:28】
車仔基奧特窄位抽入，但越位在先，車仔仲未開紀錄
【20:18】
基奧特靚回傳，簡迪右腳勁射僅出界
【20:14】
韋利安罰球斬中，魯迪加靚二傳，可惜隊友接應唔到，車仔嘥料
【20:10】
頭十分鐘車仔圍揼水晶宮，但主隊守得住
【20:01】
比賽開始。
【19:29】
車路士作客水晶宮，車仔因柏度洛迪古斯受傷，領隊沙利迫住變陣，基奧特爭贏艾華路莫拉達打正選，將同夏薩特同韋利安組成鋒線三叉戟，水晶宮大將安祖斯唐辛及韋費特沙夏亦首發出場，全力為主隊爭取入球。
水晶宮正選陣容（442）
門將：31古亞達
後衞：29雲比沙卡、5湯堅斯、12馬馬度沙高、3雲安荷特
中場：18麥亞瑟、4米利禾積域、8高耶迪、15舒洛比
前鋒：10安祖斯唐辛、11韋費特沙夏
車路士正選陣容（433）
門將：1阿列沙巴拿加
後衞：28艾斯派古達、30大衞雷斯、2魯迪格、3馬高斯阿朗素
中場：7尼高路簡迪、5佐真奴費路、8巴克里
前鋒：22韋利安、18基奧特、10夏薩特
尋晚深夜睇完英超利物浦對阿仙奴，今日當然仲有好嘢，車路士同曼城先後出擊，兩隊都係作客，喺快車賽期唔易啃呀！車仔喺8點先出擊，對手係近期表現唔曳嘅水晶宮，水晶宮前仗爆大冷勇挫曼城，成班波踢到曉飛，呢次坐鎮主場肯定又想打老虎，車仔想贏就要睇夏薩特表現喇。
曼城喺稍後10點15分出場，藍月亮會作客修咸頓。聖人自換咗領隊後表現唔曳，之前就贏過阿仙奴，肯定係豬頭骨。曼城呢期陷入低潮，近4場聯賽輸3場，已經被榜首利物浦放離10分，如果仲想爭聯賽冠軍，呢場再冇失分空間，大家想知曼城可唔可以谷底反彈，就要睇實我哋不斷更新喇！
支持本地運動員，一齊去「睇體」！
東網體育FB同你追實體壇每個精彩時刻！