【港超專版】「喇叭泉」:你練幾多我練幾多!

20190104
東網電視
更多新聞短片
認住佢!仲好有火嘅「喇叭泉」何國泉。  
近年,提起「何國泉」這名字,立刻便會想起他在上季「高級組銀牌」4強對冠忠南區時,後備上陣屢救險球,為東方龍獅保住勝局並取得決賽席位。下月便滿42歲的「泉哥」(其實大部分球圈中人都叫他『喇叭泉』)認為保持狀態的關鍵,在於個人心態:「其實每日訓練大家都係練同一樣嘅嘢,最主要係你個心態想唔想Keep得到。雖然我年紀特別大,但係我同隊友嘅訓練量係一樣,我又唔會因為年紀大專登練少啲,否則不如唔好踢啦!」 
■文:陳焌鏗
「泉哥」的職業生涯輾轉已有24年,問及他最難忘的比賽,他思考良久後表示:「東亞足球錦標賽外圍賽0比0和北韓,因為對手差唔多全隊都係參加2010年世界盃決賽周嘅星級球員,所以最難忘應該係呢場。」事實當年在港會、公民的經歷,也深深烙印在「泉哥」的腦海之中:「因為當時好多人都睇死我哋,但喺公民嗰季我哋攞到聯賽亞軍同足總盃冠軍。當年人工雖然較少,但係我哋都好勤力練波,大家都係一條心、多走一步。」
今季東方龍獅引入港隊守門員教練范俊業負責相關訓練,當「范Sir」隨港隊出外征戰,「泉哥」便身負重任:「今季形式或多或少會幫埋手訓練,當『范Sir』出外嘅時候,我就負責設立一啲訓練,幫助兩位後備龍門(廖富源、梁宇昊)練習,然後自己練埋一份,希望幫到佢哋進步。」
來到職業生涯尾段,大多數球員都會為將來投身教練行列而鋪路,「泉哥」也不例外,他期望:「如果你5、6年前問我,我會答:『淨係教龍門』,但係依家我有少少想成為一位職業隊教練,所以嚟緊除咗考筆試,攞『亞洲足協守門員教練(級別一)』之外,我都會去考『亞洲足協A級教練』,從中吸收多啲新嘅資訊。」
至於何時退役,「泉哥」明言:「我從來冇諗過,因為覺得自己仲可以踢吓,所以冇特別去諗呢樣嘢,或者都係呢1、2年內啩。如果繼續有人肯簽,而我亦有能力繼續操練的話,我都會繼續。」
【Profile】
•綽號:「喇叭泉」
•出生日期:1977年2月20日
•身高:1米78 體重:73公斤
•位置:守門員
•曾效力球隊:快譯通、好易通、晨曦、南華、港會、公民、天水圍飛馬、晨曦、太陽飛馬
•現效力球隊:東方龍獅
•球員號碼:16
囝囝遺傳門將DNA
何國泉的把關技術毋庸置疑,其優良基因更遺傳到7歲兒子何立言身上:「雖然我冇教過佢守門員嘅技巧,但囝囝的確有啲天分,可能因為細個出去球場睇波,習慣咗『睇龍門』,從中學到啲姿勢。但係我唔想佢太細個就守龍門,可能再過多兩年,當佢真係想學嘅時候,我就會教佢,依家囝囝踢唔同位置,我覺得都可以。」
其實獲得囝囝閒時入場支持,也為「泉哥」增添一份動力:「雖然依家出場唔多,但係我踢嗰幾場佢都有睇,踢得好嘅時候,佢會同我講:『爸爸好勁喎!』所以點解佢想守龍門,可能都係因為我哋影響佢。」