【港超專版】張春暉想拜「招積Sir」為師?

20190110
東網電視
更多新聞短片
【港超專版】張春暉想拜「招積Sir」為師?
港甲時代曾效力過晨曦和南華的門將張春暉,闊別香港職業球壇4年,今季復出加盟香港飛馬,綽號「神貓」的他相信學無止境,期望透過港超舞台學習更多知識,並且緊貼世界足球步伐,研究最Work打法。
圖/文:陳焌鏗
張春暉說:「依家嘅足球變化太快啦,世界盃可以話係一個足球趨勢嘅指標,好似以前西班牙捧盃,就流行Tiki-Taka,到今屆俄羅斯世界盃,打傳控嘅球隊好早就出局,行得遠嘅都係啲體力化、防守反擊嘅隊伍,所以依家已經係講緊2年一次總結,只要一有歐國盃同世界盃,就可以知道現今足球最Work係咩打法,我哋要睇多啲波、參加多啲講座同培訓班去學多啲嘢。」
上季在中甲球會梅縣鐵漢擔任守門員教練的他透露,冀能跟隨「積Sir」曾偉忠在五人足球方面進修:「依家好流行日本嘅訓練模式,其實佢哋嘅大型足球都係由小型球一步一步去演變,因為五人足球需要球員有好高嘅技術、戰術意識,當有咗呢啲基礎,去到十一人場,就可以將五人足球踢法複製落去,好似哥迪奧拿嘅Tiki-Taka咁,將十一人場劃分為若干個五人場,我比較想喺呢方面學習。」
談到未來想成為哪一種類型的教練,「春暉大哥」坦言難抉擇:「其實有啲嘢好難取捨,如果為搵食,一定係職業球隊教練,但搞青訓令我有好大滿足感,因為小朋友會問候你、家長會同你Say Hello,花心機去搞青少年足球,到頭來會有收穫。最近有個2002年出世嘅小朋友,因為佢出場率低,我見佢身體條件好,將佢改造打龍門,短短半年都唔夠,佢攞埋正選位,之後同廣州富力簽約踢青年軍,佢嘅家長不時都會問候我、約我飲茶,小朋友又會用微信搵我,問關於訓練嘅嘢,令我有好大推動力繼續從事青少年足球。」
訪問當日,「春暉大哥」不時手持相機拍攝,他表示此舉並非純粹興趣,而是希望藉此改善表現:「有時我會將訓練片段剪出嚟,擺上我哋守門員團隊嘅群組,大家一齊討論。一個人睇到嘅嘢有限,如果有人做得唔好,我哋會有3個人嘅意見,可能會發現3種唔同嘅問題,對日後增強、改善有好大幫助。」
【張春暉Profile】
•綽號:神貓
•出生日期:1983年3月14日
•身高:1米80 體重:75公斤
•位置:守門員
•曾執教球隊:梅縣鐵漢
•曾效力球隊:廣州吉利、香雪製藥、福建、流浪、南華、晨曦、南區、東區
•現效力球隊:香港飛馬
•球衣號碼:66
昔日南華3子 重聚傾仔經
張春暉效力南華期間,與文彼得、陳肇麒結緣,現在三人於香港飛馬聚首一堂,「春暉大哥」指感覺依然親切:「以前大家係隊友,依家有時練波,『文總』(領隊文彼得)都會落場一齊玩,好有以前喺南華會嘅感覺。不過嗰陣拚搏緊,依家作為球員嘅激情減少咗,諗嘢偏向教練思路多啲。」
現時三人均已成為人父,話題也跟從前不一:「後生嗰陣,我哋會傾去邊度玩,依家做晒Daddy,會傾吓小朋友嘅嘢,都係一種樂趣。特別係『文總』,佢個仔出世冇耐,有時睇佢啲相,見到佢個仔生奶癬,我第一時間畀意見佢。『肇麒』個仔就好啲,見佢Post嘅相同片,就見到佢同個仔玩得好開心。」